काठमाडौँ । सन् २०२० मा तुर्कमेनिस्तानमा हुने एएफसी कप फुटसल च्याम्पियनसिप छनोट खेल्ने नेपाली राष्ट्रिय फुटसल टोलीको विदाई गरिएको छ।
अखिल नेपाल फुटबल संघ (एन्फा) ले शुक्रबार इरानका सेन्ट्रल तथा दक्षिण एसिया छनोट खेल्न जाने नेपाली टोलीको विदाई गरेको हो।

कार्यवाहक एन्फा अध्यक्ष पंकज नेवाङले विदाई कार्यक्रममा खेलाडीलाई सफलताको शुभकामना दिए। सहिद स्मारक ए डिभिजन लिग नभएका बेला कोठमाडौंमा भएका फुटसलले नेपाली फुटबलाई ठुलो योगदान दिएको कार्यवाहक अध्यक्ष नेवाङले बताए। उनले नेपाली राष्ट्रिय फुटसल टिमको निर्माण ढिलो भएपनि उत्कृष्ट टिम रहेको समेत जानकारी दिए।

त्यस्तै प्रशिक्षक विष्णू गुरुङले राष्ट्रिय फुटसल टोलीले पछिल्लो दुई वर्षदेखी अन्तर्राष्ट्रिय प्रतियोगितामा सहभागिता जनाउँदै आएकाले यो सिक्ने अवसर रहेको बताएका छन्। ‘हामी यतीबेला शिशू अवस्थानमा छौ। यसलाई कसरी स्याहार गर्ने त्यो सबैले सोच्न जरुरी छ। यसलाई हामीले सुनौलो अवसरका रुपमा लिएका छौ,’ प्रशिक्षक गुरुङले भने। फुटस संघका सदस्य राज महर्जनले पहिलेको नतिजालाई ध्यानका राख्दै यस प्रतियोगितामा नतिजा सुधारका लागि शुभकामना दिए।

पूर्व राष्ट्रिय फुटबल खेलाडी तथा राष्ट्रिय फुटसल टिमका कप्तान विजय गुरुङले फुटसलको विकासका लागि घरेलु लिगहरु गर्न सबैलाई आग्रह समेत गरे। लिगले खेलाडीको व्यवसाहिकतामा टेवा पुग्ने र नेपाली फुटसल टोलीले ठुलो उचाई लिने विजयले विश्वस दिलाए।

छनोटको समूह ‘ए’ मा रहेको नेपालले अक्टोबर २३ मा ताजकिस्तानसँग खेल्दै प्रतियोगिताको सुरुवात गर्नेछ। त्यस्तै २४ अक्टोबरमा उज्वेकिस्तान र २५ अक्टोबरमा अफगानिस्तानसँग खेल्नेछ। प्रतियोगिता अक्टोवर २३ देखि २६ सम्म इरानमा हुनेछ।