काठमाडौंः दक्षिण अफिका विरुद्धको टेष्ट क्रिकेट सिरिज अन्तर्गत अन्तिम तथा तेस्रो खेलको पहिलो इनिङ्समा भारतीय टिमका उपकप्तान आजिंक्य रहाणेले शतक पूरा गरेका छन् ।

उनले १४ चौका र १ छक्काको मद्दतमा १६९ बलमा शतक पूरा गरेका हुन् । टेष्ट क्रिकेटमा रहाणेको यो ११औँ शतक हो ।

सस्तैमा ३ विकेट गुमाएको भारतले चौथो विकेटका लागि भने रोहित शर्मा र आजिंक रहाणेबीच उत्कृष्ट साझेदारी भएको छ । उनीहरु दुईबीच यो समाचार तयार पार्दासम्म २३६ रनको साझेदारी भइसकेको छ ।

ओपनर रोहितको १५० रन पूरा

भारतीय टिमका ओपनर रोहित शर्माले दक्षिण अफ्रिकासँगको अन्तिम खेलमा १५० रन पूरा गरेका छन् । उनले ४ छक्का र २१ चौकाको मद्दतमा १५० रन पूरा गरेका हुन् । जारी सिरिजमा रोहितले ३ शतक पूरा गरिसकेका छन् । 

सस्तैमा गुमेको थियो ३ विकेट 

भारतले ओपनर मयंक अग्रवाल, चेतेश्वर पुजारा र कप्तान विराट कोहलीलाई सस्तैमा गुमाएको थियाे । 

अन्तिम खेलको पहिलो पारीमा मयंक १०, पुजारा शून्य र कप्तान कोहली १२ रनमा आउट भए । मयंक र पुजारालाई कागिसो रबाडा र विराटलाई अन्रिच नोर्त्जेले आउट गरेका हुन् ।

रबाडाले आफ्नो टिमलाई पहिलो सफलता ४ ओभरको अन्तिम बलमा मंयकलाई एल्गरको हातबाट क्याच आउट गराए ।

यस्तै रबाडाले दोस्रो विकेटकारुपमा पुजारालाई ८.३ ओभरमा एल्बीडब्लू आउट गर्न सफल भए ।

विराटलाई १५.३ ओभरमा नोत्र्जेले एल्बीडब्लू आउट गर्न सफल भए । टेष्ट क्रिकेटमा उनको यो पहिलो विकेट हो ।

सिरिजको अन्तिम खेलमा पनि टस जितेर ब्याटिङ रोजेको भारतले यो समाचार तयार पार्दासम्म ७० ओभरमा महत्वपूर्ण ३ विकेट गुमाएर २७४ रन बनाएको छ ।

तीन खेलको सिरिज भारतले जितिसकेको छ । यदि यो खेल पनि भारतले नै जिते उसले दक्षिण अफ्रिकाविरुद्धको टेष्ट सिरिज ‘क्लिन स्विप’ गर्नेछ ।

भारत भर्सेस दक्षिण अफ्रिका शतक आजिंक्य रहाणे टेष्ट क्रिकेट सिरिज