काठमाडौंः दक्षिण अफिका विरुद्धको टेष्ट क्रिकेट सिरिज अन्तर्गत अन्तिम तथा तेस्रो खेलको पहिलो इनिङ्समा भारतीय टिमका ओपनर रोहित शर्माले दोहोरो शतक बनाएका छन् । 

उनले २८ चौका र ५ छक्काको मद्दतमा २४९ बलमा दोहोरो शतक पूरा गरेका हुन् । टेष्ट क्रिकेटमा रोहितको यो पहिलो दोहोरो शतक हो । टेष्ट करियरममा उनको यो उच्च स्कोर पनि हो । 

उपकप्तान रहाणेको शतक

भारतीय टेष्ट क्रिकेट टिमका उपकप्तान आजिंक रहाणेले शतक बनाउँदै आउट भएका छन् ।  उनले १ छक्का र १७ चौकाको मद्दतमा १९२ बलमा ११५ रनको योगदान दिए । जारी सिरिजमा रहाणेको यो पहिलो शतक हो । 

सस्तैमा गुमेको थियो ३ विकेट 

भारतले ओपनर मयंक अग्रवाल, चेतेश्वर पुजारा र कप्तान विराट कोहलीलाई सस्तैमा गुमाएको थियो । 

अन्तिम खेलको पहिलो पारीमा मयंक १०, पुजारा शून्य र कप्तान कोहली १२ रनमा आउट भए । मयंक र पुजारालाई कागिसो रबाडा र विराटलाई अन्रिच नोर्त्जेले आउट गरेका हुन् ।

रबाडाले आफ्नो टिमलाई पहिलो सफलता ४ ओभरको अन्तिम बलमा मंयकलाई एल्गरको हातबाट क्याच आउट गराए ।

यस्तै रबाडाले दोस्रो विकेटकारुपमा पुजारालाई ८.३ ओभरमा एल्बीडब्लू आउट गर्न सफल भए ।

विराटलाई १५.३ ओभरमा नोत्र्जेले एल्बीडब्लू आउट गर्न सफल भए । टेष्ट क्रिकेटमा उनको यो पहिलो विकेट हो ।

सिरिजको अन्तिम खेलमा पनि टस जितेर ब्याटिङ रोजेको भारतले यो समाचार तयार पार्दासम्म ८८ ओभरमा महत्वपूर्ण ३ विकेट गुमाएर ३७० रन बनाएको छ ।

तीन खेलको सिरिज भारतले जितिसकेको छ । यदि यो खेल पनि भारतले नै जिते उसले दक्षिण अफ्रिकाविरुद्धको टेष्ट सिरिज ‘क्लिन स्विप’ गर्नेछ ।

टेष्ट सिरिज रोहित शर्मा दोहोरो शतक