काठमाडौंः यूएईमा जारी आईसीसी टी–२० विश्वकप छनोटमा स्कटल्याण्डले पपुवा न्यूगिनीलाई १४७ रनको लक्ष्य दिएको छ । टस जितेर पहिला ब्याटिङ गरेको स्कटल्याण्डले निर्धारित २० ओभरमा ६ विकेट गुमाएर १४६ रन बनायो ।

उसका लागि कप्तान काइल कोएट्जर अर्धशतक बनाए । उनले २ छक्का र ४ चौकाको मद्दतमा ४७ बलमा ५४ रन बनाए । यस्तै म्याथ्यू क्रसले नटआउट ४०, रिची बेरिंगटनले २२ र जर्ज मुन्सेले १४ रनको योगदान दिए । अन्य खेलाडीले भने दोहोरो अंकमा रन जोड्न सकेनन् ।

बलिङमा पपुवा न्यूगिनीका चाल्र्स अम्नी, आसद भाला, डाइमिन रवु, नर्मन भानुआ र निरोशना पोकवानाले एक–एक विकेट लिए ।  

लगातार तेस्रो जितको लक्ष्यमा पपुवा न्यूगिनी

जारी प्रतियोगितामा पपुवा न्यूगिनीले लगातार दुई खेलमा जीत हासिल गरिसकेको छ । उसले पहिलो खेलमा बर्मुडालाई १० विकेटले हराएको थियो । दोस्रो खेलमा पपुवा न्यूगिनीले आइतबार नामिबियालाई ८१ रनले पराजित गर्न सफल भयो । ग्रूप ‘ए’ मा रहेको पपुवा न्यूगिनी २ खेलमा ४ अंक जोड्दै शीर्ष स्थानमा रहेको छ । 

दोस्रोे जितको खोजीमा स्कटल्याण्ड

प्रतियोगितामा स्कटल्याण्डले एकमा हार र एक खेलमा जीत हासिल गरेको छ । उसले पहिलो खेलमा सिंगापुरविरुद्ध २ रनको अप्रत्यासित हार बेहोरेको थियो । तर, दोस्रो खेलमा भने स्कटल्याण्डले केन्याविरुद्ध ३१ रनको जित निकाल्न सफल भयो । 
 

टी–२० विश्वकप छनोट स्कटल्याण्ड भर्सेस पपुवा न्यूगिनी