काठमाडौँ।  स्वतिमा र निश्चल अभिनित चलचित्र 'घामड शेरे' को रिलिज डेट सरेको छ।  कात्तिक ८ अर्थात् भोलिबाट प्रदर्शनमा आउने भनिएको चलचित्रको प्रदर्शन मिति सरेर कात्तिक २२ मा सरेको हो।  

हलमा चलिरहेका नेपाली र विदेशी सिनेमामा दर्शकको उल्लेख्य चाप रहेको र शुक्रबार रिलिज हुन लागेको अक्षय कुमारको 'हाउसफुल ४'का कारण मूख्य आम्दानीको हुने मल्टिप्लेक्समा न्यून शो पाएपछि सिनेमाको रिलिज सरेको हो।

चलचित्र वितरणको जिम्मा पाएको  'स्टेसन फाइभ'ले सिनेमा सर्नुको जानकारी दिदैं फेसबुकमा यस्तो स्टाटस शेयर गरेको छ।  "चलचित्र #घामडशेरे लाई लिएर हामी भित्र जुन उत्साह र अपेक्षा थियो त्यो उत्साह र अपेक्षासँग मेल नखाने शोज मात्र उपलब्ध हुँदा चलचित्रलाई दूई हफ्ता पछि सार्ने निर्णय गरेका छौँ। हामीलाई बिश्वास गर्नुहुने सम्पूर्ण दर्शकहरु, अहोरात्र खटिएका चलचित्रका कलाकार तथा प्राविधिकहरु र निर्माताहरुलाई पर्न गएको असुविधा प्रति क्षमाप्रार्थी छौँ।"

यसै दिनदेखि प्रदर्शनमा आउने भनिएको अर्को चलचित्र 'पोइ पर्यो काले' भने शुक्रवारदेखि नै रिलिज हुनेछ।