काठमाडौंः नेपालको पहिलो महिला फ्रेन्चाइज क्रिकेट प्रतियोगिता वुमन्स च्याम्पियन्स लिगको फाइनलमा चितवन राइनोजले क्याट क्वीन्स काठमाडौंलाई ११३ रनको लक्ष्य दिएको छ ।

टस हारेर ब्याटिङको मौका पाएको चितवनले निर्धारित २० ओभरमा ४ विकेट गुमाएर ११२ रन बनायो । उसका लागि सुमन खतिवडाले २९, कप्तान इन्दु बर्माले नटआउट २२, काँजल श्रेष्ठले २१, कञ्चन श्रेष्ठले १६ रन बनाए । बलिङमा संगिता राई, लक्ष्मी साउँद र सरस्वतीकुमारी चौधरीले एक–एक विकेट लिइन् ।  

काठमाडौं र चितवनको फाइनल खेल त्रिवि क्रिकेट मैदान कीर्तिपुरमा भइरहेको छ । राउण्ड रोबिन लिगका आधारमा भएको ५ टोली सहभागी प्रतियोगितामा चितवन सतप्रतिशत जित निकाल्दै फाइनलमा प्रवेश गरेको हो । 

काठमाडौंले भने विराटनगरसँग इलिमिनेटर खेलेको थियो । चितवन ईन्दु बर्माको नेतृत्वमा मैदान उत्रिँदा काठमाडौं रुबिना क्षेत्रीको कप्तानीमा हुनेछ । क्विन्स ईभेन्ट म्यानेजमेन्टले आयोजना गरेको प्रतियोगिताको विजेताले ७ लाख र उपविजेताले ३ लाख रुपैयाँ पुरस्कार प्राप्त गर्नेछन् ।  

वुमन्स च्याम्पियन्स लिग चितवन भर्सेस काठमाडौं