काठमाडौंः असंलग्न अभियान (नाम) का राष्ट्र तथा सरकार प्रमुखहरूको १८औं शिखर सम्मेलनका अवसरमा प्रधानमन्त्री केपी शर्मा ओलीले शुक्रबार राति भेनेजुएलाका राष्ट्रपति निकोलस मदुरोसँग साइडलाइन वार्ता गरेका छन् । मदुरो नामका निवर्तमान अध्यक्ष हुन् ।

भौगोलिक दूरी टाढा भए पनि कम्युनिस्ट विचारधाराका कारण नेपाल र भेनेजुएला सरकारबीच सुमधुर सम्बन्ध छ । अमेरिकाले भेनेजुएलामाथि आर्थिक प्रतिबन्ध लगाउँदा नेकपा अध्यक्ष पुष्पकमल दाहालले अमेरिकी कदमको विरोध जनाएका थिए । त्यसबाट चिढिएको अमेरिकाले नेपाललाई भेनेजुएलामाथि आफ्नो धारणा स्पष्ट पार्न दबाब दिएको थियो ।

सोही घटनाका कारण ओली र मदुरोबीचको भेटलाई महत्त्वका साथ हेरिएको छ । भेटमा दुई नेताले द्विपक्षीय सम्बन्धबारे छलफल गरेको प्रधानमन्त्रीका परराष्ट्र सल्लाहकार राजन भट्टराईले जानकारी दिए । मदुरोको आग्रहमा भेटवार्ता भएको उनको भनाइ छ ।

ओलीले साइडलाइन वार्ताकै क्रममा उत्तर कोरियाका राज्यव्यवस्था आयुक्त चोई योङ हईसँग भेट गरेका थिए । चोई उत्तर कोरियाका सर्वोच्च नेता किम जोङ उनका निकट पात्र मानिन्छन् । उक्त भेटमा समेत द्विपक्षीय सम्बन्धबारे छलफल भएको भट्टराईले जानकारी दिए । ओलीले साइडलाइन वार्ताअन्तर्गत नै बंगलादेशकी प्रधानमन्त्री शेख हसिना बाजेद र पाकिस्तानका राष्ट्रपति अरिफ अल्भीसँग द्विपक्षीय चासोका विषयमा वार्ता गरेका थिए । दुईदिने सम्मेलन शनिबार सकिएको छ । प्रधानमन्त्री ओली आइतबार नेपाल फर्कने कार्यक्रम रहेको परराष्ट्र मन्त्रालयले जनाएको छ ।

नेपाल नामको १८औं शिखर सम्मेलनमा एसिया–प्यासिफिक क्षेत्रको प्रतिनिधित्व गर्दै उपाध्यक्षमा चयन भएको छ । प्रधानमन्त्री ओलीले शुक्रबार एक सत्रको सञ्चालन गर्नुका साथै नेपालका तर्फबाट आफ्नो विचारसमेत राखेका थिए । यो समाचार आजको कान्तिपुर दैनिकबाट लिइएको हो ।

केपी शर्मा ओली निकोलस मदुरो शिखर सम्मेलन साइडलाइन वार्ता