काठमाडौंः सत्तारुढ नेपाल कम्युनिष्ट पार्टी (नेकपा) को आज बिहान बसेको सचिवालय बैठकले सांगठनीक एकीकरणको बाँकी कार्यभार पूरा गर्ने गरी विभिन्न केन्द्रीय निकायको अध्यक्ष र सचिव चयन गरेको छ ।

पार्टीले सांगठनीक एकीकरणको बाँकी कार्यभार पूरा गर्ने आफ्नो कार्यसूची बनाएकोमा केन्द्रीय निकायहरु गठन गर्ने कामले पूर्णता पाएको पार्टी प्रवक्ता नारायणकाजी श्रेष्ठ ‘प्रकाश’ले बताए ।

उनका अनुसार केन्द्रीय अनुशासन आयोगको अध्यक्षमा अमृत बोहरा र सचिवमा अशोक रोकाय, केन्द्रीय निर्वाचन आयोगको अध्यक्षमा विष्णु पुकार श्रेष्ठ र सचिवमा माधव पौडेल, लेखा परीक्षण आयोगको अध्यक्षमा पुष्प कँडेल र सचिवमा टेकनाथ आचार्य, केन्द्रीय सल्लाहकार कमिटीको अध्यक्षमा केशव बडाल र सचिवमा नन्दकुमार थापा चयन भएका छन् ।

यता, जेष्ठ कम्युनिष्ट मञ्चको अध्यक्षमा नन्दकुमार प्रसाईं र सचिवमा गोविन्द ज्ञवाली चयन भएका छन् ।

यसबाहेक सांगठनीक एकीकरणको बाँकी काम प्रवास संगठनको बारेमा पनि छलफल भएको प्रवक्ता श्रेष्ठले जानकारी दिए ।

केन्द्रीय आयोग गठनमा अनुशासन, लेखा परीक्षण र सल्लाहकार आयोग पूर्व एमालेको भागमा परेको छ भने निर्वाचन आयोग र जेष्ठ कम्युनिस्ट मञ्च पूर्व माओवादी केन्द्रको भागमा परेको छ ।

नेकपा सचिवालय बैठक अनुशासन आयोग