काठमाडौंः रोयल च्यालेन्जर्स बैंग्लोर (आरसीबी)ले हालसम्म इन्डियन प्रिमियर लिग (आइपीएल) को उपाधि जित्न सकेको छैन । आरसीबीले उपाधि जित्ने मौका भने नपाएको होइन । तर, फाइनल जहिल्यै पनि विपक्षी टिमको पक्षमा रह्यो । गत सिजनमा निकै खराब प्रदर्शन गरेको विराट कोहली नेतृत्वको आरसीबीले आउँदो सिजन कस्तो गर्ला? यो प्रश्न आरसीबीका समर्थकका लागि निकै रुचिकर हुनसक्छ । 

आरसीबीका समर्थक धेरै छन् । टिममा विराट कोहली, एवी डिभिलियर्स, मोइन अलि जस्ता स्टार क्रिकेटर छन् । विगत सिजनमा त टिममा विश्व क्रिकेटका विस्फोटक ब्याट्स्म्यान क्रिस गेल पनि थिए । तर, यति हुँदाहुँदै पनि टिम भने जहिल्यै उपाधिबिहीन रह्यो । 

आइपीएलमा निकै अभागी टिम मानिएको आरसीबीले २०२० को उपाधि आफ्नो पक्षमा पार्न आन्तरिक तयारी थलिसकेको छ । भारतीय सञ्चारमाध्यमका अनुसार आरसीबीले ‘अक्सन’ अघि ‘रिलिज’ गर्नसक्ने खेलाडीको नामसमेत लगभग तय गरिसकेको छ । 

यो पटक आरसीबीले गत सिजनमा आशा विपरित प्रदर्शन गरेका खेलाडीलाई नै ‘रिलिज’ गर्ने सम्भावना छ । उसो भए योपटक आरसीबीले को–को विदेशी खेलाडीलाई ‘अक्सन’ अघि नै ‘रिलिज’ गर्न गर्ला? स्पोर्ट किडा नामको अनलाइन लेख्छ–

हेनरिक क्लानेसनः दक्षिण अफ्रिकाका क्लासेन टी–२० क्रिकेटमा उत्कृष्ट ब्याट्सम्यानका रुपमा चिनिन्छन् । उनी ब्याट्सम्यान मात्र नभएर विकेटकीपर पनि हुन् । क्लासेन आरसीबीबाट आइपीएल खेल्छन् । गत सिजन उनका लागि निकै खराब रह्यो । क्लासेनले गएकाे संस्करणमा ३ म्याच खेल्दा मात्र ९ रन बनाए । गत सिजनकै प्रदर्शनलाई हेर्ने हो भने आरसीबीले उनलाई ‘रिलिज’ गर्ने सम्भावना बलियो छ । तर, यो वर्ष क्यानडामा भएको ग्लोबल टी–२० लिगमा उनले उत्कृष्ट ब्याटिङ गरेका थिए ।

मार्कस स्टोइनिसः अष्ट्रेलिया टिमका स्टोइनिस अलराउन्डर हुन् । उनी ब्याटिङसँगै बलिङमा पनि क्षमता राख्छन् । गत सिजनमा स्टोइनिसलाई किंग्स इलाभेन पन्जाबले आरसीबीलाई बेचेको थियो । आइपीएल २०१९ उनका लागि सन्तोषजनक रहेन । स्टोइनिसले गएकाे आइपीएलमा १० म्याच खेल्दा १३५ को स्ट्राइक रेटमा २ सय ११ रन मात्र बनाएका थिए । आरसीबीसँग शिवम दुबे, मोइन अलि, वासिङटन सुन्दर, पवन नेगी जस्ता अलराउन्डर छन् । उनीहरुले स्टोइनिसको स्थान लिन सक्छन् । यसो भएमा उनलाई आरसीबीले ‘रिलिज’ गर्ने पक्का जस्तै छ । 

टिम साउथीः आरसीबीले साउथीलाई २०१८ मा टिममा समावेश गरिएको थियो । उनले उक्त सिजनमा सन्तोषजनक प्रदर्शन पनि गरेका थिए । तर आइपीएल २०१९ भने साउथीको निकै खराब रह्यो । न्यूजिल्याण्ड क्रिकेट टिमका महत्वपूर्ण सदस्य उनले गत सिजनको आइपीएलमा ३ म्याचमा १३.११ को इकोनमीमा मात्र एक विकेट लिन सके । यसकारण पनि अब उनलाई आरसीबीले ‘रिलिज’ गर्नसक्छ । साथै टिममा तिव्र गतिका बलर नवदीप सैनी रहेकाले साउथीले मौका पाउन सक्ने सम्भावना न्यून छ । 

इन्डियन प्रिमियर लिग आइपीएल विराट कोहली रोयल च्यालेन्जर्स बैंग्लोर आरसीबी