काठमाडौंः यूएईमा जारी टी–१० लिगमा नेपाली क्रिकेटर पारस खड्काआवद्ध टिम आबुधाबीले बंगला टाइगर्सको सामना गर्दैछ । आबुधाबी र बंगला टाइगर्सबीचको खेल नेपाली समयअनुसार राति ९ः४५ बजेदेखि सुरु हुँदैछ । सुरुवातका तीन खेलमा एकमा जीत र एक खेलमा हार बेहोरेको थियो । कलन्दर्स विरुद्धको खेल भने टाई भएको थियो ।  

तीनमध्ये २ खेलको प्लेइङ ११ मा मौका पाएका पारसले तेस्रो म्याचमा भने अवसर पाएनन् । आबुधाबीले उनको स्थानमा वेन म्याडेसनलाई प्लेइङ ११ मा मौका दिएको थियो । तर, म्याडेसन १ रनमै रनआउटको सिकार हुन पुगे । उनी सस्तैमा आउट भएका कारण म्याडेसनको स्थानमा फेरि पनि टिमले पारसलाई समावेश गर्ने सम्भावना छ । 

सोमबार पारसबिनै मैदान उत्रिएको टिम आवुधाबी मराठा अरबियन्सविरुद्ध २४ रनले पराजित भएको थियो । टी–२० क्रिकेटमा लगातार उत्कृष्ट प्रदर्शन गरेकै आधारमा पारसलाई आबुधाबीले टी–१० लिगमा छनोट गरेकाे हाे । तर, ब्याटिङ अर्डरमा छैठौँ नम्बरमा रहेकै कारण उनले यसअघिका दुई खेलमा मात्र ४ रन मात्र जोडेका छन् ।

दुवै खेलमा नटआउट रहेका पारसले राम्रो खेल देखाउने अवसर त पाएका छैनन् नै, नराम्रो प्रदर्शन पनि छैनन् ।  जारी लिगमा पारस १० हजार अमेरिकी डलरमा टिम आवुधाबीले अनुबन्ध गरेकाे छ । अन्तर्राष्ट्रिय टी–२० क्रिकेटमा केही महिनाअघि पारसले शानदार सतक बनाएपछि टी–१० मा अनुबन्धित भएका थिए। 

टी–१० लिग पारस खड्का टिम आबुधाबी भर्सेस बंगला टाइगर्स