काठमाडौंः यूएईमा जारी टी–१० लिगमा आज पनि नेपाली क्रिकेटर सन्दीप लामिछानेआवद्ध टिम कर्नाटक टस्कर्स खेल्दै छ । ‘सुपर लिग’को आफ्नो दोस्रो खेलमा बिहीबार कर्नाटकले कलन्दर्सको सामना गर्न लागेको हो । कर्नाटक र कलन्दर्सबीचको खेल नेपाली समयअनुसार साँझ ७ः३० बजेदेखि सुरु हुनेछ ।

जारी प्रतियोगितामा सन्दीपको टिमले ४ खेलमा एकमा जीत र २ म्याचमा हार बेहोरेको छ । एक खेल भने वर्षा कारण रद्द भएको छ । ‘सुपर लिग’अन्तर्गत बुधबार मराठा अरबियन्ससँगको खेलमा वर्षा बाधक भएपछि दुवै टिमले एक–एक अंक बाँडेका थिए । जारी सिजनमा सन्दीपले ४ खेलमा ४ विकेट लिएका छन् । उनले पहिलो, चौथो खेलमा १–१ र दोस्रो म्याचमा २ विकेट लिएका थिए । तेस्रो खेलमा भने सन्दीप मंहगा सावित भए ।

डेक्कन ग्लाडियटर्स विरुद्धको उक्त खेलमा उनले २ ओभरमा बिनाविकेट ३५ रन खर्चिएका थिए । पहिलो ओभरमा ५ रन मात्र दिएका सन्दीपले दोस्रो ओभरमा भने ३० रन खर्चिएका थिए । उनको ओभरमा विस्फोटक ब्याट्सम्यान किरण पोलार्डले लगातार ४ छक्का हिर्काएका थिए । सन्दीपले डेक्कनविरुद्धको खेलमा विकेट लिने मौका भने नदिएका हाेइनन् । आफ्नो दोस्रो ओभरको अन्तिम बलमा पोलार्डलाई ‘क्याच आउट’ गराउने मौका दिए पनि फिल्डरले त्याे अवसर गुमाउन पुगे । 

चौथो खेलमा सन्दीपले २ ओभरमा २५ रन दिएर १ विकेट लिन सफल भए । पहिलो ओभरमा बिनाविकेट १४ रन दिए पनि दोस्रो ओभरमा भने उनले टिमलाई सफलता दिलाएका थिए । उनले आक्रामक ब्याटिङ गरिरहेका इंग्लिश खेलाडी एडम लिथलाई ५० रनमा ‘क्याच आउट’ गराएका थिए । जारी प्रतियोगितामा सन्दीप ४ विकेटका साथमा सर्बाधिक विकेट लिनेको सूचीमा १५औँ स्थानमा छन् । 

सन्दीपको भिडन्त आज कलन्दर्ससँग

टी–१० मा कलन्दर्सको कप्तानी इंग्लिश क्रिकेटर डेभिड मलानले सम्हालि रहेका छन् । कलन्दर्सले ४ खेलमा २ मा हार र एक खेलमा जित हासिल गरेको छ । टिम आबुधाबीसँगको खेल भने बराबरी हुँदा एक–एक अंक बाँडिएको थियो ।

कलन्दर्समा मलान बाहेक क्रिस जोर्डन, लउरी इभन्स, लुकि रोञ्ची, मुजीउर रहमान, लाहिरु कुमारा, टम ब्यान्टन लागयत नाम चलेका क्रिकेटर छन् । यता सन्दीपआवद्ध कर्नाटकमा हासिम अमाला (कप्तान), इभन लुईस, जनसन चार्ल्स, उपल थरंगा जस्ता अनुभवी क्रिकेटर रहेको छन् । 

पाकिस्तान सुपर लिग (पीएसएल) को लाहोर कलन्दर्स र टी–१० मा रहेको कलन्दर्सको टिम मालिक एकै हुन् । सन्दीपले पीएसएलमा लाहोर कलन्दर्सबाट खेलेका थिए । गत सिजनमा पीएसएलमा उत्कृष्ट प्रदर्शन गरेका सन्दीप योपटक महंगा मूल्यमा बिक्री हुने सम्भावना छ ।

पारसको टिमको आज छैन म्याच

यो सिजनको टी–१०लिगमा नेपाली क्रिकेट टिमका कप्तान पारस खड्का पनि छन् । उनी टिम आबुधाबीबाट टी–१० मा जोडिएका हुन् । सुरुवातका २ खेलमा खेल्ने मौका पाएका पारसलाई पछिल्ला खेलमा भने प्लेइङ ११ मा समावेश गरिएको छ । उनले पहिलो खेलमा ३ र दोस्रो म्याचमा नटआउट १ रन बनाएका थिए । प्रशस्त ब्याटिङ गर्न नपाएका कारण पारसले टी–१० मा आफ्नो क्षमता प्रदर्शन गर्न सकिरहेका छैनन् ।

लगातार म्याच खेलिहरेको उनीआबद्ध आबुधाबीको खेल आज भने छैन । पारसको टिमले ५ खेलमा एकमा जित, २ म्याचमा हार बेहोरेको छ । २ खेलमा भने आबुधाबीले अंक बाँड्नु परेको छ । पहिलो खेलमा टाई म्याच खेल्दा र पाँच खेलमा वर्षा बाधक बन्दा आबुधाबीले अंक बाँड्नु परेको हो । पारसआवद्ध आबुधाबी ५ अंकका साथ तालिकाको पाँचौ स्थानमा छ । 

सन्दीप लामिछाने कर्नाटक टस्कर्स र कलन्दर्स