मन्त्रिपरिषद् पुनर्गठन, पार्टीका आन्तरिक समस्या, छिमेकीसंगको सीमा विवाद, आफ्नो बिग्रदो स्वास्थ्यकाबीच प्रधानमन्त्री केपी शर्मा ओलीले परिवर्तनको अनुभूति गराउने प्रयास जारी राखेका छन् । सरकार जनअपेक्षा अनुसार अघि बढ्न नसकेको गुनासो आएपछि उनले सचिवालयदेखि मन्त्रिपरिषद्समेत फेरबदल गरेका छन् । 

अस्वस्थताबीच प्रधानमन्त्री ओलीको यो प्रयासलाई प्रमुख प्रतिपक्षी नेपाली कांग्रेसले पनि सकारात्मकरुपमै हेरेको छ । मुलुक र जनताको निम्ति इमान्दार भएर गरिएका प्रयासलाई हतारमा आलोचना गर्नु राजनीतिक संस्कार होइन । अझ, सीमा अतिक्रमणका विषयमा प्रधानमन्त्रीले जुटाएको राजनीतिक सहमति पनि राम्रो काम भएको बताउँछन् कांग्रेस केन्द्रीय सदस्य कल्याण गुरुङ । 

गुरुङ भन्छन्, ‘प्रधानमन्त्रीलाई शंका गर्नु हुँदैन । बर्षौदेखि अतिक्रमणमा परेको सीमा फर्काउने कुरा एक दुई दिनमा हुँदैन । कुटनीति भनेको भित्रभित्रै हुने कुरा हो । धेरै कुरा बाहिर आएका हुँदैनन् । सरकारले पक्कै केही काम गरिरहेको हुनुपर्छ । मुलुकको अखण्डता र सार्वभौमिकता रक्षामा सरकारलाई हाम्रो समर्थन छ ।’

जहाँसम्म सचिवालय र मन्त्री फेरबदलको कुरा छ, यसले केही हदसम्म सरकारको गतिमा परिवर्तन आउन सक्ने अपेक्षा गर्न सकिन्छ, तर कायापलट नै हुन्छ भन्ने विश्वास छैन । 

सीमा विवाद अन्त्य गर्न उच्चस्तरीय कुटनीतिक पहल नै सबैभन्दा उत्तम हो । तत्काल मुद्दा अन्तर्राष्ट्रियकरण गर्ने वा सीमा सुरक्षा बल पठाएर भिडन्त गर्ने भन्ने कुरा आवेश र उत्तेजना मात्र हुन् । 

गुरुङ भन्छन्, ‘तत्काल संसद बोलाएर यो विषयमा छलफल गर्नुपर्छ । विभिन्न क्षेत्रका सांसदहरुले आ–आफ्नो क्षेत्रको सीमाको अवस्थाबारे जानकारी दिनुहुन्छ । विचार राख्नु हुन्छ । उत्तर होस वा दक्षिणको छिमेकी कसले कहाँ अर्घेल्याईं गरेको छ, त्यो संसदमै स्पष्ट हुन्छ । संसदबाट प्रस्ताव पास गरेपछि अनि वार्ताको प्रक्रिया अघि बढाउने हो । यति गर्दा विवाद हल हुन्छ । ’

सरकारले सीमा सुरक्षाका लागि सरकारी संयन्त्रलाई ती स्थानमा पुर्याउनुपर्छ । अहिलेसम्म सरकारी संयन्त्र नपुग्नु भनेको सरकारी इच्छाशक्ति नहुनु देखिन्छ । अब केन्द्रसहित प्रदेश सरकारले सीमा क्षेत्रलाई विशेष महत्व दिएर रणनीतिकरुपमा सुरक्षा तथा सेवामूलक सेवा विस्तार गर्नु अनिवार्य छ । 

नेपाली कांग्रेस राष्ट्रियताको मामिलामा सरकारको साथमा रहेकाले प्रधानमन्त्रीले आत्मबल बलियो बनाएर अघि बढ्नुपर्छ । तर, जहाँसम्म सरकारले एकलौटी ढंगले अधिनायकवादको गन्ध आउने किसिमले काम गरिरहेको छ, त्यो चाहिँ सच्याउनुपर्छ । २१ महिनाको अवधिमा सरकारका २१ असफलताबारे प्रवक्ता विश्वप्रकाश शर्माले पत्रकार सम्मेलन गरेर जानकारी गराइसक्नु भएको छ । 

यो सरकारले २१ महिना पूरा गरेको छ । अब तीन वर्ष तीन महिना बाँकी छ । यो अवधि चलाउने पनि नेकपाले नै हो । जति गलत र विवादास्पद काम गरेपनि विधिसम्मत रुपमा सरकार ढल्ने अवस्था छैन । सरकारकाविरुद्ध आन्दोलन गरेर सरकार ढाल्ने परिकल्पना कांग्रेसले गरेको छैन । यसो गर्दा संविधान नै खतरामा पर्ने कांग्रेसको बुझाइ छ । कांग्रेस संविधानप्रति प्रतिबद्ध रहेकाले यसको रक्षाका लागि जस्तोसुकै त्याग गर्न पनि तयार छ । 

‘सरकारले यो अवधिमा एउटा पनि राम्रो काम गर्न सकेको छैन । सुखी नेपाली समृद्ध नेपालको नारा लिएको छ तर एउटा पनि नेपालीलाई सुखी राख्न सकेको छैन । को छ आज सुखी ?’ गुरुङको प्रश्न छ । 

मंसिर १४ गतेको उपनिर्वाचनले पनि सरकारको अलोकप्रियता देखाउने छ । कांग्रेस कमजोर भएको थियो, तर अहिले तङ्ग्रिदै  छ । उपनिर्वाचनको परिणामले पनि यो सत्य सावित गर्नेछ ।