काठमाडौंः १३ औं दक्षिण एसियाली खेलकुद (साग) को टी–२० दोस्रो अभ्यास खेलमा पनि नेपाल ‘ए’ टिम विजयी भएको छ । दोस्रो अभ्यास म्याचमा नेपालल १ सय ७ रनले विजयी भएको हो ।

नेपालले दिएको २ सय १७ रनको विशाल लक्ष्य पछ्याएको  माल्दिभ्सले निर्धारित २० ओभरमा ७ विकेट गुमाएर १ सय ९ रन मात्र बनाउन सक्यो । उसका लागि मोहम्मद आजमले २६ सर्बाधिक रन बनाए । बलिङमा नेपालका बिक्रम शोब, मञ्जित श्रेष्ठ, तलिक राज भण्डारीले २–२ र शेर मल्लले एक विकेट लिए । 

यसअघि मूलपानी क्रिकेट मैदानमा टस हारेर ब्याटिङको मौका पाएको नेपालले निर्धारित २० ओभरमा ३ विकेट गुमाएर २ सय १६ रन बनायो । नेपालका लागि सिनियर टोलीका अनुभवी ब्याट्सम्यान शरद भेषावकर आक्रामक ब्याटिङ गरे । उनले ४२ बलमा ४ चौका र ८ छक्कासहित ८४ रन बनाए ।  

यस्तै प्रदीप ऐरीले ३६ बलमा ४ चौका र ६ छक्का ६९, दिलिप नाथले २७, अमित श्रेष्ठले नटआउट २५ रन बनाए । बलिङमा माल्दिभ्सका लिम सफिकले ३ विकेट लिए । नेपाल ‘ए’ र माल्दिभ्सबीचको अन्तिम तथा तेस्रो अभ्यास खेल शनिवार हुने छ ।

नेपाल भर्सेस माल्दिभ्स