काठमाडौंः १३ औँ दक्षिण एसियाली खेलकुद (साग) को समापन समारोहको दिन आज रंगशाला हाताभित्रै प्रहरीले पत्रकारमाथि कुटपिट गरेको छ । दशरथ रंगशालाको सुरक्षामा खटिएका तीनजना डिएसपीले रंगशालामै पत्रकारलाई कुटपिट गरेका हुन् । डिएसपीहरु रुगम कुँवर, सन्तोष सिंह राठौर र राजेन्द्र धमलाले पत्रकारसहित सर्वसाधारणमाथि लाठी र लात्ती बर्साएका हुन् । उनीहरुले पक्रिसकेपछि पनि सर्वसाधारणमाथि जथाभावी कुटपिट गरेका थिए ।

सर्वसाधारणमाथि जाइ लागेका बेला फोटो खिचेको आरोपमा डिएसपी राठौरले नागरिक दैनिकका खेल पत्रकार सुमन चापागाईंमाथि लात्ती नै बर्साएका छन् । उनीलाई एकजना प्रहरीले पक्रिएपछि राठौरले पछाडिबाट लात्ती बर्साएका हुन् ।

नेपाल र भुटानबीच हुने फुटबलको फाइनल भीडन्तको टिकटको मूल्य दोब्बर बढाएपछि सर्वसाधरण विरोधमा उत्रिएका थिए । फुटबल हेर्न रंगशाला आसपास जम्मा भएका सर्वसाधारणमाथि प्रहरीले कुटपिट गरेको थियो ।

विवाद चर्किँदै गएपछि प्रहरीले दर्शकलाई जथाभावी कुट्न थालेको थियो। दर्शकलाई प्रहरीले कुटेको फोटो खिचेको भन्दै पत्रकार चापागाईंमाथि राठौरसहितले कुटपिट गरेका हुन् । पत्रकार चापागाईंलाई प्रहरीले आयोजकबाट उपलब्ध एक्रिडेसन कार्ड लगाएको अवस्थामा समातेर कुटेको हो । प्रहरीको कुटपिटबाट चापागाईंको कानबाट रगत आएपछि उपचारका लागि अस्पताल भर्ना गरिएको छ ।  

१३ औं साग दशरथ रंगशाला सन्तोष सिंह राठौर राजेन्द्र धमला रुगम कुँवर सुमन चापागाईं