नेपाली कांग्रेसका केन्द्रीय सदस्य एवं सांसद देवेन्द्रराज कँडेलको प्रश्न छ– ‘लिपुलेक, कालापानी र लिम्पियाधुराका विषयमा नेकपा र अहिलेको सरकार के गर्दैछ ? निर्वाचनअघि सडकमा चर्का नारा लगाउने नेकपाका भ्रातृ संगठन कहाँ लुके ? काठमाडौंका सडकमा राँको बाल्नेहरु कालापानी र सुस्तामा गएर बोल्न सक्छन् ?’

नेपालका कम्युनिष्टहरु लोकतन्त्रको खोल ओढेर मुलुकलाई सिध्याउने गतिविधिमा संलग्न भएको नेता कँडेलको दावी छ । उनीहरुको ध्यान केवल सत्ताको कुर्सीमा कसरी पुग्नेमा भन्नेमा मात्र केन्द्रीत छ । नभए वर्तमान सरकारका गतिविधि हेरौं । 

१ ) भारत र चीनसँगको सीमा विवादका विषयमा के पहल भयो ?
२) गुप्तचरलाई व्यक्तिगत विवरण लिने सम्बन्धी विधेयक के का लागि हो ?
३ ) मानवअधिकार, प्रेस, सुरक्षा, गुठी सम्बन्धी विधेयकको मनशाय के हो ?
४) विरामी प्रधानमन्त्रीले राज्यका प्रमुख निकाय आफू मातहत राखेर के गर्न खोजेको ?
५) आफ्नै पार्टीका नेता भ्रष्टाचार  र दण्डहीनतामा संलग्न हुँदा संरक्षण किन ? 
६) अमेरिकी ‘इण्डोप्यासिफिक स्ट्राटिजी’ र चीनको ‘बिआरआई’ मा दोहोरो भूमिका किन ?
७ ) महङ्गीले जनताको ढाड भाँचिदा पनि किन केही नगरेको ? 
८ ) शिक्षा र स्वास्थ्यमा आफ्नै नेताहरुको लगानी बढाएर समाजवाद आउँछ ? 

नेकपा पार्टी र सरकारले जवाफ दिन नसकेका थुप्रै प्रश्नहरु छन् । नेकपा राष्ट्रियताका सवालमा सबैभन्दा कमजोर दल हो । उसको राष्ट्रियता कुर्सीका लागि मात्र हो भन्ने अहिले प्रमाणित भइसक्यो । 

नेता कँडेल भन्छन्, ‘सरकार अधिनायकवादको शैलीमा अघि बढ्न खोज्दैछ । यो भनेको उसको समाप्तिको बाटो हो । संसारमा कुनैपनि तानाशाही र साम्यवादी सरकार लामो समय चलेका छैनन् । एकछिनका लागि उनीहरुलाई सुख त होला तर त्यो अवसानको बाटो हो ।’

कांग्रेसको झगडा
कांग्रेसमा अहिले देखिएको झगडा अनावश्यक हो । यो सभापति शेरबहादुर देउवालाई कमजोर देखाएर आगामी महाधिवेशनमा आफूलाई शक्तिशाली देखाउने प्रपञ्च मात्र हो । एक किसिमले भन्ने हो भने यो भागवण्डामा बढी हिस्सा खोज्न मच्चाएको कोलाहल मात्र हो । 

आज सभापति देउवालाई असक्षम र असफल नेताका रुपमा चित्रित गर्न खोजिदैछ । जो आफू चुनाव जित्दैन उसले देउवालाई असफल भन्न मिल्छ ? अरुलाई असक्षम भन्नेले पहिला आफूले चुनाव जितेर देखाउनु परेन ? 

हिन्दु प्रमुख एजेण्डा
अब कांग्रेसको मात्र नभएर मुलुकको प्रमुख एजेण्डा हिन्दु राष्ट्र हुनुपर्छ । पछिल्लो समय कांग्रेसमा धर्मनिरपेक्षताको पक्ष लिनेहरु अहिले मौन छन् । यो भनेको हिन्दु राष्ट्रको एजेण्डामा समर्थन जनाउनु हो । 

छिमेकी भारतमा हिन्दुत्वलाई मद्दत पुग्ने गरी सरकारले काम गरिरहेको छ । अयोध्या राम मन्दिर बाबरी मस्जिदको मुद्दा होस वा पछिल्लो नागरिकता सम्बन्धी नयाँ कानुनको व्यवस्था होस, सबै हिन्दुत्वलाई बढावा दिने गरी आएका छन् । नेतृत्व र निर्णय भनेको यस्तो हुनुपर्छ । 

यही कारण भाजपाले आगामी चुनाव पनि सहजरुपमा जित्ने र प्रधानमन्त्रीमा पुनः नरेन्द्र मोदी हुने लगभग निश्चित छ ।  भारतले नेपाल हिन्दु राष्ट्र बनोस भन्ने चाहेको छ । यो भारतको सद्भाव हो । तर, हिन्दुत्वका लागि नेपाली आफैं लाग्नु पर्छ । संघीयता र गणतन्त्रका विषयमा अहिले प्रश्न उठाउने समय आएको छैन ।