काठमाडौंः अष्ट्रेलियामा जारी बिग बास लिग (बीबीएल) अन्तर्गत होबार्ट हरिकेन्सविरुद्ध नेपाली लेग स्पिनर सन्दीप लामिछानेआवद्ध मेलबर्न स्टार्सले टस जितेर पहिला ब्याटिङ गर्ने निर्णय गरेको छ । होबार्ट र मेलबर्नबीचको खेल नेपाली समयअनुसार बिहान ९ः३० बजेदेखि सुरु हुँदैछ । मेलबर्नले आफ्नो दोस्रो म्याच होबार्ट हरिकेन्सविरुद्ध खेल्न लागेको हो ।

मेलबर्नले पहिलो खेलमा ब्रिसबेन हिटविरुद्ध २२ रनको जित हासिल गरेको थियो । उक्त खेलमा सन्दीपले ४ ओभर बलिङ गर्दै ३८ रन दिएर महत्वपूर्ण एक विकेट लिएका थिए ।

क्रिस लिन नेतृत्वको ब्रिसबेनविरुद्ध आफ्नो पहिलो ओभरमा १९ रच खर्चिदै महँगा भएका सन्दीपले दोस्रो ओभरदेखि भने लय समातेका थिए । उनले आफ्नो अन्तिम ओभरमा ब्रिसबेनका अलराउन्डर बेन कटिङलाई आउट गर्दै जारी सिजनको पहिलो सफलता हात पारेका थिए ।

पहिलो खेलमा मेलबर्नले जित हासिल गरेको र दोस्रो ओभरदेखि लयमा देखिएकाले आज पनि सन्दीपले प्लेइङ ११ मा मौका पाएका छन् । जारी सिजनको बीबीएलमा पनि मेलबर्न स्टार्सको नेतृत्व विस्फोटक ब्याटिङ अलराउन्डर ग्लेन म्याक्सवेलले सम्हालिरहेका छन् ।

गत सिजनको बीबीएल पनि सन्दीपले मेलबर्नबाटै खेलेका थिए । जसमा उनले ८ म्याचमा ११ विकेट लिएका थिए । प्रतियोगिताको बीचमै उनी बंगलादेश प्रिमियर लिग (बीबीएल) खेल्न बंगलादेश गएका थिए । 

बीबीएल बिग बास लिग होबार्ट हरिकेन्सविरुद्ध मेलबर्न स्टार्स