काठमाडौंः अष्ट्रेलियामा जारी बिग बास लिग (बीबीएल) अन्तर्गत होबार्ट हरिकेन्सविरुद्ध सन्दीप लामिछानेआवद्ध मेलबर्न स्टार्स ५२ रनले विजयी भएको छ । मेलबर्नले दिएको १ सय ६४ रनको लक्ष्य पछ्याएको होबार्टले १६ ओभरमा सबै विकेट गुमाएर १ सय ११ रन मात्र बनाउन सक्यो । उसका लागि क्लाइव गुलाबले सर्बाधिक नटआउट १८ बलमा ३२ रन बनाए । बलिङमा मेलबर्नका हरिश रौफले ४ ओभरमा २७ रन दिएर ५ विकेट लिए ।

यस्तै एडम जम्पा, ग्लेन म्याक्सवेलले २–२ र सन्दीप लामिछानले १ विकेट लिए । आज सन्दीपले ३ ओभरमा १८ रन दिएर १ विकेट लिएका हुन् । यसअघि टस जितेर ब्याटिङ गरेको मेलबर्नले होबार्ट हरिकेन्सलाई १ सय ६४ रनको लक्ष्य दिएको छ । मेलर्नका लागि ओपनर मार्कस स्टोइनिसले उत्कृष्ट ब्याटिङ गरे । उनले ४ छक्का र ७ चौका प्रहार गर्दै ५४ बलमा नटआउट ८१ रन बनाए ।

यस्तै निक म्याडिन्सनले ४०, बेन डंकले १९, कप्तान ग्लेन म्याक्सवेलले २, पीटर ह्यान्सक्बले ३ र हिल्टन कार्टराइटले अविजित ११ रनको योगदान दिए । बलिङमा होबार्टका रिले मेरीडिथले सर्बाधिक ३ विकेट लिए । मेलबर्नले पहिलो खेलमा ब्रिसबेन हिटविरुद्ध २२ रनको जित हासिल गरेको थियो । उक्त खेलमा सन्दीपले ४ ओभर बलिङ गर्दै ३८ रन दिएर महत्वपूर्ण एक विकेट लिएका थिए । 

बिग बास लिग बीबीएल होबार्ट हरिकेन्सविरुद्ध मेलबर्न स्टार्स सन्दीप लामिछाने