नेपाली कांग्रेसकी केन्द्रीय सदस्य एवम सांसद डा. डीला संग्रौलाका अनुसार अहिले देशभर नेपाल ट्रष्टको सम्पत्ति यति होल्डिङ्सलाई दिने नीतिगत निर्णय प्रधानमन्त्री केपी शर्मा ओली स्वयंले गरिरहेका छन् । 

आफू विरामी अवस्थामा हुँदा पनि मन्त्रिपरिषद् बैठक राखेर हतार हतारमा यतिलाई ट्रष्टको सम्पत्ति जिम्मा लगाउनुको उद्देश्य के हो ? ट्रष्टको ऐन नै परिवर्तन गरी आफू अनुकूल सुविधाको व्यवस्था गर्नु नै अपराध थियो । अझ प्रधानमन्त्री निवास बालुवाटारमा पार्टी निकट पत्रकारहरुलाई बोलाएर यतिलाई ट्रष्टको सम्पत्ति दिनु कानुनसम्मत भएको बताएर उनले आफू नै यतिको संचालक भएको पुष्टि गरेका छन् । 

डा. संग्रौला भन्छिन्, ‘मुलुकमा नीतिगत भ्रष्टाचारको नेतृत्व नै प्रधानमन्त्रीले गरिरहेका छन् । आफना मान्छे भ्रष्टाचारमा परे तिनलाई सफाइ दिने काम पनि उनी आफैं गर्छन् । आज सुनकाण्ड, बालुवाटारकाण्ड, एनसेल काण्ड, मेलम्ची, बुढीगण्डी, वाइड तथा न्यारोबडी....लगायतका विषयमा सरकारले के गर्यो ? भन्ने बेलामा भ्रष्टाचारीको मुख हेर्दिन भन्ने तर भ्रष्टाचारको नायिके आफै बन्ने । वास्तवमा भन्ने हो भने सिंहदरवार नै भ्रष्टाचारको जगमा उभिएको छ । ’

हुँदाहुँदा अब मुलुकमा सांसदको अधिकार पनि कुण्ठित गर्न थालिएको छ । नेकपाको सचिवालय बैठकले प्रदेश ३ को नाम र राजधानी तोक्नु कहाँसम्मको अत्याचार हो ? प्रदेशको नाम र राजधानी तोक्ने काम संसदको हो कि नेकपा भन्ने पार्टीको ? संसदलाई निर्देशन दिने अधिकार त्यो पार्टीले कहाँबाट पायो ? 

डा. संग्रौलाका अनुसार प्रदेश ३ का प्रमुख डोरमणि पौड्याल नेकपाका कठपुतली हुन् । उनी नेकपा पार्टीको कार्यकर्ता जस्ता देखिए । नेकपाले आफनो अधिकार खोसेपछि अब प्रदेश ३ का सांसद जागरुक हुनुपर्छ । उनीहरुले यसको विरोध गर्नसक्नु पर्छ । 

नेकपा निर्वाचनबाट चुनिएर आएको भएपनि यसले जनभावनाको सम्मान गर्न सकेन । जनताले मत दिएको यो देशमा कम्युनिष्ट व्यवस्था ल्याउन होइन, आफना समस्या समाधान गर्न हो । तर, सरकार त समृद्धिका नारा उछालेर भ्रष्टाचार गर्नतर्फ मात्र लाग्यो । जनतामाथि करै कर, समस्यै समस्या । 

कम्युनिष्टहरुको अधिनायकवादबाट मुक्त गर्न देशमा ठूलो आन्दोलनको आवश्यकता छ । अब नेपाली कांग्रेसले त्यो जागरणको नेतृत्व गर्नेछ । 

जहाँसम्म हाल कांग्रेसमा देखिएको विवाद छ त्यो महाधिवेशन लागेको भन्ने बुझे हुन्छ । पार्टीका ठूला नेताहरुलाई महाधिवेशन लागिसकेको छ । आउँदो १४औं महाधिवेशनमा नेतृत्वको हानाथाप चलिरहेकाले नेताहरुमा विवाद जस्तो देखिएको हो, कुनै सैद्धान्तिक लडाइँ छैन । 

नेविसंघ र तरुण दलमा भागवण्डा नमिल्नु नै अहिलेको प्रमुख समस्या हो । सभापति शेरबहादुर देउवाले पौडेल पक्षको भावनाको सम्मान गर्दै सहमतिका लागि त्यो स्थान सुरक्षित राखेका छन् । चाँडै कुरा मिल्छ, कुनै समस्या छैन । पार्टी टुक्रिने भन्ने चिन्ता लिनु पर्दैन ।