१३औं सागः १७ स्वर्ण पदकका लागि प्रतिस्पर्धा हुँदै आज
काठमाडौंः दक्षिण एसियाली खेलकुद (साग) अन्तगर्त मंगलबार १७ स्वर्ण पदकका लागि प्रतिस्पर्धा हुँदैछ । मंगलबारदेखि भलिबल खेल सम्पन्न हुनेछ । दुईवटा स्वर्णका लागि फाइनल खेल हुँदैछ । पुरुष तर्फको उपाधिका लागि भारत र पाकिस्तान आमने सामने हुँदै छन् भने महिला तर्फ नेपाल र भारत प्रतिस्पर्धा गर्दै छन् ।
त्रिपूरेवरस्थित राष्ट्रिय खेलकुद परिषद्को कवर्डहलमा हुने पुरुष तर्फको फाइनल खेल दिउँसो दुई बजे हुनेछ भने महिलातर्फको खेल ४ बजेपछि सञ्चालन हुने छन् । आजदेखि एथलेटिक्सका खेलहरु पनि सञ्चालन हुने छन् । एथलेटिक्समा १,५०० मिटर पुरुष र महिला, सटपुट पुरुष र महिलाको खेल सञ्चालन हुनेछ । एथलेटिक्समा एक सय र चार सय मिटर दौड तथा हर्डल्सका हिट पनि सञ्चालन हुनेछन् ।
यस्तै करातेमा ६ वटा स्वर्णको छिनोफानो हुनेछ । पुरुषको ६० केजी मुनी, ६७ केजी मुनी र ७५ केजी मुनीको प्रतिष्पर्धा हुनेछ भने महिला तर्फ ५५ केजी मुनी, ६१ केजी मुनी र ६८ केजी मुनीमा खेल संचालन हुनेछ ।
यस्तै उसुमा महिला र पुरुषको चाङक्वान गरी दुई स्वर्णको टुंगो लाग्नेछ । टेबल टेनिसमा पनि पुरुष र महिलाको टिम इभेन्टका खेलहरु सम्पन्न हुने छन् । ट्रायाथलनमा मिक्सड रिलेको फाइनल हुनेछ ।
फुटबलमा नेपालले भुटानसँग प्रतिष्पर्धा गर्दैछ । नेपाल र भुटानबीचको खेल दशरथ रंगशालामा दिउँसो एक बजे हुनेछ भने बंगलादेश र माल्दिभ्सबीचको खेल साँझ पाँच बजे सुरु हुनेछ । महिला फुटबलमा नेपाल र श्रीलंका तथा भारत र माल्दिभ्स खेल्दैछन् ।
आजदेखि पुरुष क्रिकेट सुरु हुँदैछ । पुरुष क्रिकेटमा नेपाल र श्रीलंकाको यू–२३ टिमबीच प्रतिष्पर्धा हुनेछ । पोखरामा हुने महिला क्रिकेटमा भने श्रीलंका र बंगलादेश खेल्ने छन् ।
आजदेखि सातदोबाटोको सुटिङ रेन्जमा सुटिङका प्रतिष्पर्धा हुँदै छन् । लन टेनिसमा टिम इभेन्टका सेमिफाइनलका खेलहरु सञ्चालन हुने छन् ।
साग स्वर्ण पदक
