काठमाडौंः १३ औँ दक्षिण एसियाली खेलकुद (साग) अन्तर्गत महिला भलिबलको स्वर्णपदकका लागि आज नेपाल र भारत पनि भिड्दै छन् । महिला भलिबलको फाइनलमा नेपाल र भारतबीच दिउँसो २ बजे प्रतिष्पर्धा हुनेछ । पुरुष भलिबलमा दिउँसो ४ बजे भारत र पाकिस्तान स्वर्ण पदकका लागि भिड्ने छन् । 

पुरुष फुटबलमा नेपालले आज भुटानसँग प्रतिष्पर्धा गर्दैछ । खेल दिउँसो १ बजे दशरथ रंगशालामा हुनेछ । नेपाल पहिलो खेल खेल्न लागेको हो भने भुटानले हिजो बंगलादेशलाई हराउँदै ३ अंक जोडिसकेको छ । दशरथ रंगशालामा साँझ ५ बजे माल्दिभ्स र बंगलादेशबीच अर्को खेल हुनेछ । पोखरा रंगशालामा हुने महिला फुटबलमा नेपालले विहान १० बजे श्रीलंकासँग प्रतिष्पर्धा गर्नेछ । दिउँसो अर्को खेलमा भारत र माल्दिभ्स भिड्दैछन् । आज भलिबलका खेलहरु सकिने छन् । 

पुरुष टी–२० क्रिकेटमा नेपालले आज श्रीलंकासँग प्रतिष्पर्धा गर्दैछ । खेल त्रिवी क्रिकेट मैदान किर्तिपुरमा विहान ११ बजे हुनेछ । पोखरामा भइरहेको महिला क्रिकेटमा श्रीलंका र बंगलादेश भिड्ने छन् । नेपालले थप पदकको आशा गरेको करातेमा ६ खेल हुने छन् । खेल विहान ९ बजेदेखि नेपाल कराते एकेडेमीको कभर्डहलमा सुरु हुनेछ । तेक्वान्दोमा आज ४ स्वर्णपदकको टुंगो लाग्नेछ। उसुमा महिला र पुरुष चाङक्वानको दुई वटा स्वर्ण पदकको छिनोफानो हुनेछ ।

एथलेटिक्सतर्फ विभिन्न ९ वटा प्रतिष्पर्धा हुँदै छन् । आजै खोखो, ब्याडमिन्टन, गल्फलगायतका खेल पनि आज हुँदै छन् । सोमबार पहिलो दिन नेपाल १५ स्वर्ण ३ रजत र ६ कास्य पदकसहित कूल २४ पदक जितेर पहिलो स्थानमा रहेको छ । ३ स्वर्ण ८ रजत र ३ कास्यसहित १४ पदक जितेको भारत दोस्रो र ३ स्वर्ण ७ रजत र १४ कास्यसहित २४ पदक जितेको श्रीलंका तेस्रो स्थानमा रहेका छन् ।  

साग स्वर्णपदक नेपाल भर्सेस भारत महिला भलिबल टिम