१३ औं दक्षिण एशियाली खेलकुद प्रतियोगिता (साग) को उद्घाटन नै यति भव्य भयो कि अस्पतालको शैयामा रहेका प्रधानमन्त्री केपी शर्मा ओलीले पनि भिडियो सन्देशमार्फत सबैलाई धन्यवाद दिए । प्रधानमन्त्रीलाई त्यसरी आत्मबल आउनुमा सागको अभूतपूर्व रुपमा उद्घाटन हुनु पनि एउटा कारण हो । 

राष्ट्रिय खेलकुद तयारी समितिका सचिव महेन्द्रकुमार राईका अनुसार १३ औं साग जसरी सफलतापूर्वक अघि बढिरहेको छ, यसको सम्पूर्ण श्रेय राखेप सदस्य सचिव रमेश सिलवाललाई जान्छ । सदस्य सचिव नियुक्त भएलगत्तै जुन आत्मविश्वास र समन्वयका साथ सिलवालले काम गरे, त्यसैले साग आयोजना गर्न सम्भव भएको हो । साग हुँदैन क्या हो भन्ने स्थितिमा पुगेका बेला सिलवालको नेतृत्व र सक्रियताले आज सबै नेपालीले गर्व गर्ने मौका पाएका छन् । 

राष्ट्रिय तयारी टिमका निर्देशक र कराँतेका वरिष्ठ प्रशिक्षकसमेत रहेका राई भन्छन्, ‘कार्यविधि र बजेटसमेत समयमा पास हुन सकेको थिएन । खेलकुदका विभिन्न विधाका पदाधिकारीसमेत अन्योलमा थिए । तर, साग शानका साथ भैरहेको छ । छिटफुट केही सामान्य व्यवधान होलान्, त्यसको कुनै अर्थ छैन । ’

आफनो गृह मैदानमा प्रतियोगिता भएकाले खेलाडीहरुले पनि अपेक्षा भन्दा बढी प्रदर्शन गरेका छन् । खासगरी कराँते, उसु र ताइक्वान्दोमा खेलाडीहरुले अद्वितीय प्रदर्शन गरेका छन् । अन्य खेलमा पनि आशा गरे भन्दा बढी पदक आएका छन् । यो सबैमा घरेलु मैदान र दर्शकको समर्थनले काम गरेको छ । 

सबै खेलका लागि आवश्यक सबै पूर्वाधार नेपालले शानदार रुपमा तयार गरेको छ । केही ठाउँमा बनाउने र खेलाउने काम संगसंगै पनि भैरहेको छ । अन्य देशमा पनि यस्तै हो । अझ सागका लागि भौतिक पूर्वाधारको तुलना गर्ने हो अन्य देश भन्दा नेपालको निकै ‘स्ट्याण्डर्ड’ छ । 

नेपालमा खेलाडीसहित प्रशिक्षकहरुको भविष्य निकै राम्रो छ । अहिले सरकारी निकाय मात्र होइन निजी क्षेत्रमा पनि धमाधम काम पाइन्छ । इज्जत, मान प्रतिष्ठा पनि उत्तिकै  छ । बरु नेपाल सरकारले खेलाडी र प्रशिक्षकहरुलाई विदेशमा तालिमका लागि पठाउन जरुरी छ । खेल क्षेत्रको विकासका लागि सातवटै प्रदेशमा भौतिक संरचना निर्माण गर्ने र दक्षताका लागि विदेशका तालिम गराउनु जरुरी भैसक्यो । 

पछिल्लो समय केही खेलाडीमा अनुशासनहीनता देखिएकाले उनीहरुमाथि निर्मम कारवाही पनि थालिएको छ । फुटबलर विमल घर्ती लगायत केही खेलाडीले अनुशासन तोडेकाले उनीहरुलाई प्रतियोगितामा राखिएन । 

ब्राजिलमा राष्ट्रपतिले आग्रह गर्दासमेत अनुशासन तोडेका भेट्रान खेलाडी रोमारियोलाई टिममा नराखेको स्मरण गर्दै राईले भने, ‘अनुशासन पालना नगर्नेलाई त कुनै हालतमा पनि एक्सक्युज हुँदैन । ’

नेपालमा जसरी क्रिकेट र फुटबलमा सरकारले लगानी गरेको छ, त्यसैगरी खेलाडीहरुको पनि रुचि भएको र तक्मा पनि जितिरहेको ‘मार्सलआर्ट’मा लगानी बढाउनुपर्ने राय राईको छ ।