काठमाडौंः १३ औं दक्षिण एसियाली खेलकुद (साग) पुरुष टी–२० क्रिकेट अन्तर्गत भुटान विरुद्धको खेलमा नेपाली क्रिकेट टिमका कप्तान ज्ञानेन्द्र मल्लले शानदार शतक बनाएका छन् । उनले ८ छक्का र ५ चौकाको मद्दतमा ५३ बलमा शतक बनाएका हुन् ।

अन्तर्राष्ट्रिय टी–२० क्रिकेटमा उनको यो पहिलो शतक हो । साथै उनी नेपालबाट टी–२० अन्तराष्ट्रिय क्रिकेटमा शतक बनाउने दोस्रो खेलाडी बनेका छन् ।

नेपालले ओपनर पारस खड्कालाई ५७, रोहितकुमार पौडेललाई ६ रनमा गुमाएको छ । अघिल्लो खेलमा १ रनमै आउट भएका पारसले आज १ छक्का र ९ चौकाको मद्दतमा २८ बलमा ५७ रन बनाए ।

नेपाल–भुटानबीचको खेल कीर्तिपुर स्थित टियू क्रिकेट मैदानमा भइरहेको छ ।

पहिलो खेलमा श्रीलंका–२३ सँग ६ विकेटले पराजित भएको नेपाल भुटनाविरुद्ध सहज जितको अपेक्षामा छ । भुटान पनि पहिलो खेलमा श्रीलंका–२३ सँग नै १ सय ७३ रनले पराजित भएको थियो ।

भुटानविरुद्ध नेपालले २ खेलाडी परिवर्तन गरेको छ । युवा तीब्र गतिका बलर राशिद खानले डेब्यू गर्ने मौका पाएका छन् । आजको खेलमा सोमपाल कामी र अभिनाश बोहरालाई विश्राम दिइएको छ । उनको स्थानमा रोहित कुमार पौडेल र राशिदलाई मौका दिइएको हो ।

नेपालको प्लेइङ ११ः

ज्ञानेन्द्र मल्ल (कप्तान), पारस खड्का, दीपेन्द्र सिंह ऐरी, विनोद भण्डारी, करण केसी, आरिफ शेख, पवन सरार्फ, ललित नारायाण राजवंशी, सुसन भारी, रोहित कुमार पौडेल र राशिद खान ।

ज्ञानेन्द्र मल्ल टी–२० क्रिकेट भुटान भर्सेस नेपाल