काठमाडौंः १३ औं दक्षिण एसियाली खेलकुद (साग) को पुरुष टी–२० क्रिकेट अन्तर्गत भुटान विरुद्धको खेलमा नेपाल १ सय ४१ रनले विजयी भएको छ । नेपालले दिएको २ सय ३८ रनको विशाल लक्ष्य पछ्याएको भेटानले निर्धारित २० ओभरमा ६ विकेट गुमाएर ९५ रन मात्र बनाउन सक्याे । 

उसका लागि रञ्जुङ मिक्यो दोर्जीले ४ छक्काको मद्दतमा २७ बलमा सर्बाधिक २७ रन बनाए । बलिङमा पारस खड्काले २, पवन सराफ, ललितनारायण राजवंशी र करन केसीले एक–एक विकेट लिए । यसअघि कीर्तिपुर स्थित टियू क्रिकेट मैदानमा टस हारेर ब्याटिङको मौका पाएको नेपालले निर्धारित २० ओभरमा ३ विकेट गुमाएर २ सय ३७ रन बनायो ।

नेपालले टी–२० मा बनाएको यो अहिलेसम्मकै उच्च स्कोर हो । नेपालका लागि कप्तान ज्ञानेन्द्र मल्लले शतक बनाए । उनले ९ छक्का र ५ चौकाको मद्दतमा ५५ बलमा १०७ रन बनाए ।

टि–२० मा शतक प्रहार गर्ने मल्ल नेपालका दोस्रा खेलाडी हुन् । यसअघि पारस खड्काले शतक प्रहार गरेका थिए । यस्तै पारस खड्काले १ छक्का र ९ चौकाको मद्दतमा २८ बलमा ५७ रनको योगदान दिए ।

दिपेन्द्र सिंह ऐरी ४५ र आरिफ शेख ४ रनमा नटआउट रहे । रोहितकुमार पौडेल भने ६ बलमा ६ रन बनाउँदै ‘क्याच आउट’को सिकार भए । बलिङमा भुटानका कर्मा डोर्जीले २ र टोबडेन सिंग्येले एक विकेट लिए ।

पहिलो खेलमा नेपाल श्रीलंका–२३ सँग ६ विकेटले पराजित भएको थियो । भुटान पनि पहिलो खेलमा श्रीलंका–२३ सँग नै १ सय ७३ रनले पराजित भएको थियो । 

नेपाल भर्सेस भुटान साग टी–२० पुरुष क्रिकेट