काठमाडौंः १३ औँ दक्षिण एसियाली खेलकुद (साग) अन्तर्गत पुरुष क्रिकेटमा कांस्य पदकका लागि भइरहेको खेलमा माल्दिभ्सले दिएको ९५ रनको लक्ष्य पछ्याउने क्रममा नेपालले सस्तैमा ४ विकेट गुमाएको छ ।

नेपालले चौथो विकेटका रुपमा आरिफ शेखलाई ३२ रनमा गुमाएको हो । उनी रन आउटको सिकार हुन पुगे । यसअघि नेपालले ज्ञानेन्द्र मल्ललाई २२, पारस खड्कालाई ३ र दिपेन्द्रसिंह ऐरीलाई २ रनमा गुमाइसकेको छ ।  

यसअघि कीर्तिपुर स्थित टियू क्रिकेट मैदानमा टस हारेर ब्याटिङको मौका पाएको माल्दिभ्सले निर्धारित २० ओभरमा ९ विकेट गुमाएर ९४ रन बनायो ।

उसका लागि लीम शफीगले सर्बाधिक नटआउट १९ रन बनाए । बलिङमा ललित राजवंशीले ३, सुशन भारीले २ र पारस खड्काले १ विकेट लिए ।

समूह चरणमा नेपालविरुद्ध माल्दिभ्स ८४ रनले पराजित भएको थियो । उक्त खेलमा नेपालले निर्धारित २० ओभरमा ७ विकेट गुमाएर १ सय ६३ रन बनाएको थियो ।

उक्त खेलमा नेपालका अलराउन्डर करन केसीले विस्फोटक ब्याटिङ गरेका थिए । उनले १६ बलमा ४ छक्का र २ चौकाको मद्दतमा १६ बलमा नटआउट ४० रन बनाएका थिए ।

१ सय ६४ रनको लक्ष्य पछ्याएको माल्दिभ्सले पूरा २० ओभर खेल्न सफल हुँदै ७९ रन बनाएको थियो । आजै दिउँसो १ बजे स्वर्ण पदकका लागि श्रीलंका र बंगलादेश खेल्दै छन् ।

१३ औं साग आरिफ शेख माल्दिभ्सविरुद्ध नेपाल