डा. दीपक भट्टराई नेपाल इञ्जिनियरिङ कलेज भक्तपुरका उपाध्यक्ष हुन् । कलेजको सञ्चालक समितिले अध्यक्ष लम्बोदर न्यौपानेलाई कारबाही गरेर निकालिदिएको छ । अध्यक्षकै भरमा कलेज चलिरहेको छ । लम्बोदर तिनै व्यक्ति हुन् जसले अख्यितार दुरुपयोग अनुसन्धान आयोगका आयुक्त राजनारायाण पाठकलाई ७८ लाख खुवाउन मानिस परिचालन र स्रोत व्यवस्थापन गरेका थिए । लम्बोदरले कलेजबाट २१ करोड रुपैयाँ आफूखुसी झिके र त्यही पैसा विभिन्न निकायमा घुस खुवाउनका लागि प्रयोग गरे भन्ने दावी डा. भट्टराईको छ । यो प्रकरणसँग जोडिएका तर विवादमा नपरेका उपाध्यक्षले यस विषयमा महत्वपूर्ण धारणाहरु राखेका छन् । ती धारणाहरु निम्नानुसार छन्ः 

 

नेपाल इञ्जिनियरिङ कलेजलाई बाँडीचुडी खाने र सार्वजनिक सम्पत्ति मास्न चाहने लम्बोदर न्यौपानेसहित पाँच जना र उनीहरुजस्तै भ्रष्ट राजनारायण पाठकबीचको कर्तुत बाहिर आएको छ । यो कुरा हामीले २० महिनादेखि कराउँदै आएका थियौं । त्यतिले नपुगेर विभिन्न सरकारी निकायमा सार्वजनिक सम्पत्ति भ्रष्टहरुले हडप्न लागे, बचाइदिनु पर्यो भन्दै गुहार माग्ने र उजुरी दिने काम गरेका थियौं । यतिबेला आएर यो प्रकरणको चुरो कुरो नै बाहिर आएपछि केही सन्तुष्टि मिलेको छ । 

 

यो कलेजमा मैले २५ वर्षअगाडि १८ लाख रुपैयाँ लगानी गरेको थिएँ । बाँकी सञ्चालक सबै तन्नम थिए । उनीहरुसँग पैसा नभएर एक लाख, दुई लाख गरेर भएको पैसा लगानी गरेका थिए । यो मैले पैसाको फूर्ति लगाएको होइन, साँचो कुरा बोलेको हो । मैले सामाजिक संस्था बनाउन भनेर लगानी गरेको हो । मुनाफारहित संस्था बनाएका थियौं । सबै सञ्चालकले त्यही शर्तमा हस्ताक्षर गरेका छन् । अहिले पैसा थुप्रियो, केही सञ्चालकहरुले पैसा बाँडेर खानु पर्छ भन्न थाले । अहिले सञ्चालक समिति ५ जना बाँडेर सक्नु पर्छ, खानुपर्छ भनेका छन् । बाँकी ६ जनाले यो बाँड्ने कुरा होइन भनेका छौं । बाँडेर खानु पाउनु पर्छ भन्नेहरुविरुद्ध हामीले अख्तियारमा उजुरी दिएका थियौं । 

 

 

लम्बोदर न्यौपाने र उनको समूह भ्रष्ट, धुर्त, बेइमानहरुको समूह हो । धमिराहरुको समूह हो यो । सूर्यबहादुर केसी सांसद हुन् । दुई चार हाइड्रोका मालिक हुन् । सम्पत्ति जति पनि छ । तर यहाँ सामाजिक संस्थाको रुपमा रहेको कलेज खान उहाँले गर्नुभएको काम हेर्नुस त कति लज्जास्पद छ । भ्रष्ट, अनैतिक व्यक्तिहरुको समूहमा उहाँ पनि हुनुहुन्छ । 

 

 मलाई दुई पटक पैसाको प्रस्ताव आएको छ । लम्बोदरको भाईले मलाई ८ कराडको प्रस्ताव गरे । अर्को समूह फेरि आयो, त्यो समूहले २० करोड लिनुस भन्न आयो । मैले २० करोड लिएर के गर्ने ? मैले मानिन । ४ वर्ष मबाट लुकाएर यो षडयन्त्र गरिएको रहेछ । 

 

एउटै नामको कम्पनी खोलेर नेपाल इञ्जिनियरिङ कलेजको सबै सम्पत्ति त्यसमा लैजाने खेल हो । यो ब्रम्हाण्डमा सबैभन्दा जाली मानिसहरुको समूह लम्बोदरसँग छ । मेरो विरुद्धमा प्रधानमन्त्रीको कार्यालयमा निवेदन दिने पनि लम्बोदर हुन् । उनले मेरो बारेमा अनर्गल कुरा लेखेर बुझाएका छन् । तर म दुई चार करोडमा बिक्ने मान्छे होइन । २० करोड त छाडे भने म यिनीहरुलाई विद्यार्थीको शुल्कबाट जम्मा भएको पैसा खान दिन्छु होला ? 

 

हामीले ७४ साउन १८ मा अख्तियारमा उजुरी दर्ता गरेका हौं । हामीले फर्जी कम्पनी खोलेर सामाजिक संस्थाको सम्पत्ति हडप्ने प्रयास भइरहेको दावी गरेका थियौं । त्यसपछि अख्तियारले अनुसन्धान अधिकृत तोक्यो । हामीलाई पनि एक पटक बयानका लागि बोलाएको थियो । हामीले कलेजको सम्पत्ति जोगाउन उजुरी गर्ने, लम्बोदरको समूहले आयुक्तलाई नै किन्ने खेल भएछ । अनुसन्धान अधिकृत रामप्रसाद सुवेदी असल मान्छे हुनुहुन्थ्यो । उहाँसँग मैले भेटे पनि । तर उहाँले आयुक्तले फाइल अगाडि नबढाउन भन्नु भएको छ भन्नुभयो । उहाँले आयूक्तलाई भेट्नु पनि भन्नुभयो । मैले उहाँलाई भेट्न चाहिनँ । मैले जसले गल्ती गरेको छ, उसैलाई जेल हाल्नूस् भनेँ । 

 

मलाई सूर्यनाथ उपाध्यायको पालादेखि मलाई अख्तियारप्रति विश्वास थियो । मलाई अख्तियारप्रति अगाध विश्वास थियो । अहिले भने अख्तियारप्रति विश्वास उठ्यो । अख्तियारभनेको त नाटक गर्नेहरुको अखडा पो रहेछ । अख्तियारका आयुक्तलाई हाम्रै कलेजको खाताबाट गएको पैसा बुझाइएको हो । अहिले कुरा ७८ लाखको आएको छ । तर यिनीहरुले पैसा सबैतिर पुर्याएका छन् भन्ने मेरो अनुमान हो । हामी जहाँ जहाँ उजुरी दिन जान्थ्यो, त्यही त्यही लम्बोदरको समूह पैसा लिएर पुग्थ्यो । सायद यहि भएर होलो, हाम्रो फाइल हरेक निकायमा ओथारो बसेको छ ।