नेकपा अध्यक्ष एवम पूर्व प्रधानमन्त्री पुष्पकमल दाहाल ‘प्रचण्ड’ ले दिएको अमेरिकाबिरोधी वक्तव्य चीनको सरकारी मुखपत्र ‘ग्लोबल टाइम्स’ मा छापियो । प्रचण्डले वक्तव्य दिए लगत्तै ‘ग्लोबल टाइम्स’ मा छापेर चीन आफू प्रसन्न भएको स्पष्ट संकेत गरेको हो । 

 

सबैलाई थाहा भएकै कुरा हो अमेरिका र चीनबीच अहिले पनि ब्यापार युद्ध चलिरहेको छ । दुवै मुलुक बिश्वका शक्तिशाली राष्ट्र हुन् । चीनले अमेरिकाको बजारमासमेत प्रभुत्व जमाउन थालेपछि अमेरिकी राष्ट्रपति डोनाल्ड ट्रम्पले चिनियाँ सामानमा कर बढाएका थिए । चीनले पनि अमेरिकी सामानमा बिस्तारै कडाइ गर्यो । 

 

यो तनाव अन्त्य गर्न दुवै पक्षबीच पटक–पटक वार्ता भएपनि अवस्था उस्तै छ । अहिले अमेरिकाले भेनेजुएलामा हस्तक्षेप गरेको बिषयलाई लिएर रुसले मुखै खोलेर आपत्ति जनाएको छ । चीनले पनि अमेरिकी कदमलाई बेठिक भनेको छ । यही सन्दर्भमा प्रचण्डले अमेरिकाबिरोधी वक्तव्य दिएपछि चीन दंग परेको परराष्ट्र जानकार हरी चन्द ‘अग्निपुञ्ज’ बताउँछन् । 

 

ओलीको छायाबाट मुक्त हुने चाल

प्रचण्डले वक्तव्य दिनुुको एउटा प्रमुख कारण प्रधानमन्त्री केपी ओलीको छायाबाट मुक्त हुनु रहेको चन्दको दाबी छ । सरकार र पार्टी दुवैमा ओली हावी भएपछि त्यसबाट राष्ट्रिय तथा अन्तर्राष्ट्रिय ध्यान आफूतर्फ मोड्न उनको चाल हुनसक्ने चन्दको तर्क छ । 

प्रचण्डमाथि जनताको शंका

प्रचण्डले पार्टीको कुनैपनि तहमा छलफल नगरी एकलरुपमा दिएको वक्तव्यले पार्टी र सरकारलाई क्षति पुगेको छ । यसले पार्टीमा मनमुटाव मात्र ल्याएको छैन सरकारलाई नै बिघटनको संघारमा पुर्याएको छ । जतिबेला जे पनि गर्न सक्ने भएकाले प्रचण्डमाथि जनताको आशंका बढेको र यसले स्वयं प्रचण्डकै राजनीतिक जीवनमाथि धब्बा लाग्न सक्ने चन्दको ठहर छ । 

 

चीन, भारत र नेपाल एकसाथ

भेनेजुएला प्रकरणमा चीनसंगै भारत र भारतसंगै प्रचण्ड, नेकपा र अहिलेको सरकार एकसाथ रहेको चन्द बताउँछन् । अमेरिकाको ‘इण्डो प्यासिफिक स्ट्राटिजी’ मा नेपाल मिसिन नहुने धारणामा ओली र प्रचण्ड एकमत रहेको चन्दको दाबी छ । यसले अमेरिकासंग तनाव भएपनि भारत र चीनसंग सम्बन्ध राम्रो रहने उनको भनाइ छ ।

 

प्रचण्डले राजदूत बेरीलाई भेट्नु गल्ती
परराष्ट्र मामिलामा पि.एच.डी गर्दै रहेका चन्दले प्रचण्डले वक्तव्य दिएपछि अमेरिकी राजदूत बेरीलाई भेटेर गल्ती गरेको औंल्याएका छन् । जबसम्म अमेरिकाले भेनेजुएलासम्बन्धी नीति सच्याउँदैन तबसम्म राजदूतलाई भेट्दिन भनेर प्रचण्डले अडान लिएको भए उनको उचाई थप बढ्नसक्ने उनको आंकलन छ । 

 

जसलाई समर्थन गर्यो उसैले वास्ता गरेन

प्रचण्ड, नेपाल सरकार वा नेकपाले भेनेजुएलाका राष्ट्रपति निकोलस माडुरो पक्षमा वक्तव्य दिएका हुन् । तर, माडुरोले धन्यवादसमेत दिएनन् । यीनको समर्थन वा बिरोधले माडुरोलाई केही फरक पार्दैन ।