अबको राजनीतिक परिदृश्य हो सरकारबिरुद्ध भीषण आन्दोलन । यसको अगुवाइ गर्नेछन् भर्खरै अनसन तोडेर शिक्षण अस्पतालमा तङग्रीरहेका प्रा.डा. गोविन्द केसीले । प्रमुख बाहना त्यही हुनेछ चिकित्सा शिक्षा बिधेयक । 

डा.केसीको १६औं चरणको अनसनमा समर्थन जनाउन र उनको प्राण जोगाउनका लाग पहल गर्न शिक्षण अस्पताल को को पुगे ? 

सामान्य मान्छेको कुरा छोडौं । यो पटक पूर्व राष्ट्रपति डा. रामवरण यादव पनि पुगेका छन । पूर्व प्रधानन्यायाधीश सुशील कार्की र  पूर्व सभामुख दमननाथ ढुंगानाले त केसीलाई जुस नै खुवाएर अनसन तोडाए । पूर्व प्रधानमन्त्री एवम कांग्रेस सभापति शेरबहादुर देउवापनि केसीलाई मनाउन अस्पताल पुगे ।

 

 
केसीले इलामबाट आफनो १६औं चरणको अनसन सुरु गरेपछि उनलाई त्यहीं भेटन कार्की र ढुंगानासंगै एक दर्जन अधिकारकर्मी तथा नागरिक अगुवा पुगेका थिए । यो केसीप्रतिको व्यक्तिगत माया र लगावले होइन, बर्तमान सरकारप्रतिको आक्रोश पनि हो । आफैले गरेका सहमति कार्यान्वयन नगरी उल्टो सत्याग्रही केसीको बदनाम गर्न थालेपछि बर्तमान सरकारबिरुद्ध अधिकारकर्मी र नागरिक अगुवापनि एकजुट भएका हुन् । 

 

केही समयअघिको कुरा गरौं । यीनै डा. केसीको आन्दोलनमार्फत बहालवाला प्रधानन्यायाधीश गोपाल पराजुली र अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीले पदबाट हात धुनु परेको थियो । त्योबेलाको बिजयी उत्सवमा माइतीघरमा आयोजित कार्यक्रममा चर्चित वकिल एवम डा. केसीका सहयोगी ओमप्रकाश अर्यालले आगामी योजनाबारे प्रष्ट पारेका थिए । उनले त्यहीबेला माफीयाको संरक्षक केपी ओलीबिरुद्ध अबको आन्दोलन सोझिने उद्घोष नै गरेका थिए । यसका लागि ओली निशानामा परिसकेको बताउँदै ओलीका प्रत्येक कर्तूतहरु ट्रेस गर्ने काम भैरहेको जानकारी गरेका थिए । 

 

२४ दिन लामो १६औं अनसन तोड्नेक्रममा डा. केसीले पनि प्रधानमन्त्री ओलीबिरुद्ध आक्रोश पोखेका छन । इलाममा अनसन सुरु गर्दै गर्दापनि उनले प्रधानमन्त्री ओली र नेकपा अध्यक्ष पुष्पकमल दाहाल प्रचण्डलाई भ्रष्टाचारी र माफियाको संरक्षक भन्दै मुलुकको सबैभन्दा ठूलो अपराधीको संज्ञा दिएका थिए । 

 

आज डा. केसीको मागमा निर्मला पन्त र द्वन्द्वकालका मुद्दासमेत पर्नुको कारण ओली र प्रचण्डलाई सिध्याउनु नै हो । यो उनको पुरानो योजना हो । अहिले एकाएक लहडमा हडबडाएर उनले बोलेका पनि होइनन्, लेखेका पनि होइनन् । यो सबै पूर्वयोजना हो, जसको संकेत अधिवक्ता अर्यालले पहिले नै गरिसकेका थिए । 

अब के हुन्छ त ? 

डा. केसीलाई अनसन तोडन भन्दै सबैभन्दा पहिले आग्रह गर्ने व्यक्ति थिए, कांग्रेस सभापति शेरबहादुर देउवा । उनले भनेको कुरा निकै महत्वपूर्ण छ । उनले भनेका थिए,–‘ केही माग पूरा भएका छन् र बाँकीका लागि तपाईको नेतृत्वमा आन्दोलन गरौंला, अनसन तोड्नूहोस । ’

 

सभापति देउवाले डा.केसीलाई तपाईको नेतृत्वमा आन्दोलन गरौंला भन्नुको पछाडी ठूलो योजना छ । अहिले कांग्रेस सरकारबिरुद्ध सडक र सदन दुर्वतर्फ आन्दोलनमा छ ।  उसले लगातार संसद् अवरुद्ध गरिरहेको छ भने माघ २१ गते सरकारबिरुद्ध देशब्यापी प्रदर्शन गर्दैछ । भ्रातृसंगठनहरु दैनिक प्रदर्शन गरिरहेका छन् । यो बेला कांग्रेस सरकारबिरुद्धको आन्दोलनमा अन्य सारथीको खोजिमा छ । 

 

कांग्रेससंगै बिवेकशील साझाका दुवै समूह पनि सडक प्रदर्शनमा छन् । बिधेयक र कानूनका सवालमा उनीहरुको माग र कांग्रेसको मागमा केही भिन्नता छैन ।

भर्खरै पार्टी एक गरेका पशुपतिशम्शेर राणा र प्रकाशचन्द्र लोहनी समूहपनि सरकारबिरुद्धको लडाईंका लागि कांग्रेससंग परामर्शमा जुटिसकेका छन् । कमल थापा नेतृत्वको राप्रपा त हिन्दू राष्ट्रको एजेण्डासहित चरणबद्ध आन्दोलनमा पहिलेदेखि नै छ, अझ चर्काउने उसको योजना छ । 

सरकारले आफूसंग भएको सहमति अनुसार संविधान संशोधन नगरेको भन्दै सरकारमै रहेको संघीय समाजवादी फोरमले प्रधानमन्त्रीलाई ज्ञापनपत्र बुझाई कुनैपनि बेला सरकारबाट बाहिरिने चेतावनी दिइसकेको छ । सरकारलाई समर्थन दिएको राजपा पनि समर्थन फिर्तालिएसंगै आन्दोलनमा जाने तयारी छ । 
यहीबेला भेनेजुएला प्रकरणमा सरकार नराम्ररी फँसेको छ । अमेरिका सरकारसंग क्रुद्ध भएको छ । अमेरिका र उसको गठवन्धनका सबै राष्ट्र सरकारको बिरुद्धमा देखिएका छन् । 

 

सरकारलाई भारत र चीनले पनि बिश्वास गर्न छोडेका छन् । हिन्दू राष्ट्र बनाउने सवालमा धोका दिएको, भारतको पुनेमा सार्क राष्ट्रबीच संयुक्त सैन्य अभ्यास गर्ने बिषयबाट पछि हटेको, चीनलाई बुढीगण्डकी दिएको लगायतका बिषयमा भारत असन्तुष्ट छ । 

उता, चीनपनि ब्यापारिक, पारवाहन तथा यातायात सम्झौता कार्यान्वयनमा ओली सरकारले वास्ता नगरेपछि चिढीएको छ । साथै, अमेरिकाको इण्डोप्यासिफिक स्ट्राटिजीमा रुची देखाएको तर आफनो वान वेल्ट वान रोडप्रति खासै चासो नदिएको चीनको गुनासो छ । 

यी सबैले बर्तमान ओली सरकारको राष्ट्रिय तथा अन्तर्राष्ट्रिय परिस्थिति सहज नभएको देखाउँछ । भन्नुको अर्थ बर्तमान सरकार घेराबन्दीमा परिसकेको छ । 
अझ सो पार्टी भित्रै बामदेव गौतम, माधव नेपाल, झलनाथ खनाल, नारायणकाजी श्रेष्ठ लगायत समूहको असन्तुष्टि बढ्दै गएकाले आन्तरिकरुपमा पनि अवस्था बलियो छैन । बामदेव गौतमलाई सांसद बनाउने कुरामा ओली र प्रचण्डले धोका दिएपछि स्थिति बिकराल बनेको हो । प्रमुख चार जना नेताले केन्द्रीय सचिवालय बैठक बहिष्कार गरेर अध्यक्षद्वय ओली र प्रचण्डलाई झट्का दिएको धेरै समय भएको छैन । 

 

यी सबै कारणले सरकारबिरुद्धको माहोलले दिनप्रतिदिन बलियो रुप पाइरहेको छ ।  यसको नेतृत्व कांग्रेस आफै गर्न चाहन्छ । डा. गोविन्द केसीप्रति अपार जनसमर्थन र उनका मुद्दाको जग पनि बलियो भएकाले उनलाई पनि साथमा लिने कांग्रेसको योजना हो । यसका लागि डा. केसीको जीवनरक्षा एकदम जरुरी थियो । 

 

केसी सडकमा निस्किने हो भने लाखौं मानिस देशभर सडकमा आउनेछन् । बिभिन्न राजनीतिक दल, नागरिक अगुवा, अधिकारकर्मी, चिकित्सकसहितका पेशाकर्मीको आन्दोलनलाई सरकारले थेग्न सक्ने छैन ।

यो भन्दा अघि सरकार भ्रष्टाचारी र अपराधिको संरक्षक बनेको, अधिनायकवाद लाद्न खोजेको, प्रजातन्त्र मास्त खोजेको लगायतका बिषय उछालेर सरकारलाई अन्तर्राष्ट्रियस्तरमै बदनाम गरिनेछ ।  यसले दुई तिहाई भएपनि सरकारलाई क्षण भरमै भष्म गर्न सक्ने कांग्रेस र स्वयं केसी समर्थकहरुको पनि बिश्वास छ । यो बिषयमा यीनीहरुको आपसी सल्लाह त भएको छैन तर सरकारबिरुद्धको मत भने एउटै छ । 

केसी तङ्रग्रीनुअघि कांग्रेस लगायतका दल र नागरिक अगुवाहरुले छिटपुट प्रदर्शन गरिरहनेछन् । जसै, केसी फूर्तिला हुनेछन....आन्दोलन चर्किनेछ....केसी अघिअघि...अरु पछिपछि... ।