काठमाडौं । प्रधानमन्त्री केपी शर्मा ओलीले आफ्नो टिममा रहेका असक्षम मन्त्रीहरु हटाउने तयारी गरेका छन् । 

 

आफ्नो विभागीय काम राम्रो निर्वाह नगर्ने उल्टो उनीहरुको कामले सरकारको शाख ध्वस्त हुन थालेपछि प्रधानमन्त्री ओली केही मन्त्रीलाई कुनै पनि हालतमा हटाउने नै निष्कर्षमा पुगेका छन् । जानकार स्रोतका अनुसार भौतिक योजना तथा यातायात मन्त्री रघुवीर महासेठ, पर्यटन, नागरिक उड्यन तथा संस्कृतिमन्त्री रवीन्द्र अधिकारी सबैभन्दा हिट लिस्टमा छन् । 

 

आफ्नो जिम्मेवारी राम्रो पूरा नगर्नेमा कृषिमन्त्री चक्रपाणि खनाल  र भूमि व्यवस्था, सहकारी तथा गरिबी निवारण मन्त्री पद्मा अर्याल पनि छन् । प्रधानमन्त्री ओली आपूर्तिमन्त्री मातृका यादव, वनमन्त्री शक्ति बस्नेत र संघीय मामिला तथा सामान्य प्रशासनमन्त्री लालबाबु पण्डितसँग पनि असन्तुष्ट छन् । 

 

कुन मन्त्रीका के कमजोरी ? 
 

रवीन्द्र अधिकारी– अधिकारी जुझारु युवाको रुपमा प्रधानमन्त्री ओलीले राम्रो मन्त्रालयको जिम्मेवारी दिएका थिए । तर यिनले वाइडवडी विमान प्रकरणमा संसदमा समेत झूठ बोलेर आफ्नो पदीय गरिमाको बेइज्जत गरे । युवा भनिए पनि आफ्नो अंगरक्षकलाई आफ्नो कोट बोकाएको, यिनको छातासमेत अंगरक्षकले ओढाईदिएको भिडियो सार्वजनिक भयो । पर्यटन क्षेत्रका तमाम विषय छाडेर यिनी पनि बुढा नेताहरु झै उदघाटन्, मेलापर्वमा रमाउन थालेपछि यिनको औचित्य समाप्त भएको ठहर प्रधानमन्त्री ओलीले गरेका छन् । 

 

रघुवीर महासेठ– सरकारको पहिलो चोटिलो एक्सन सार्वजनिक सवारीहरुमा रहेको सिण्डिकेट तोड््ने बन्यो । तर महासेठ आफैले भिलेनको भूमिका खेले । सिण्डिकेटविरुद्धको एक्सनमा बलियोगरी प्रस्तुत भएका तत्कालीन सहसचिव रुपनारायण भट्टराईलाई मन्त्री महासेठले दिनुसम्म दुःख दिए । वर्तमान मन्त्रीमण्डलका सबैभन्दा धनी महासेठलाई युवा र मधेसी भनेर प्रधानमन्त्री ओलीले राम्रो मन्त्रालय जिम्मा लगाएका थिए । तर यिनीबाट कुनै रचनात्मक काम नदेखिनु, उल्टो सरकारको बद्नाम हुने काममात्रै हुन थालेपछि महासेठलाई फाल्नु पर्ने निष्कर्षमा ओली पुगेको चर्चा छ । 

 

चक्रपाणि खनाल– ध्वंश र निर्माण ठीक विपरीत शब्दहरु हुन् । विगतमा जनमुक्ति सेनाको कमाण्डर रहेका कृषिमन्त्री चक्रपाणि खनालले देशमा धेरै ध्वंश मच्चाए । अब सिर्जना र किसानको लागि काम गर्ने बेला आएको छ । किसान र मजदुर वर्गको हितका लागि भनेर जनयुद्ध गरेका खनाललाई नै प्रधानमन्त्री ओलीले कृषिको जिम्मा दिए । तर यिनकै पालामा किसानले बन्दाकोभीमा डोजर चलाउनु परेको छ । कृषिसँग सम्बन्धित उद्योग सिध्याउन मन्त्री खनाल नै लागिपरेपछि यिनी अहिले हिट लिस्टमा छन् । सरकारी स्वामीत्वको डिडिसीको दूध पिउन योग्य छैन भन्ने यिनै हुन् । कालीमाटी तरकारी बजारमा अनुगमनका नाममा झिल्के काम गर्ने पनि यिनै हुन् । किसानका मूल समस्यामा कहिले गम्भीर नहुने, कार्यक्रम नल्याउने तर सधै स्टन्ट गर्दै हिँड्न थालेपछि यिनको पत्ता कट्न लागेको हो । 

 

पद्मा अर्याल– भूमि व्यवस्था, सहकारी तथा गरिबी निवारण मन्त्रालयको जिम्मेवारी पाएकी पद्मा अर्यालले देशको गरिबी भन्दा आफ्नै गरिबी निवारण गर्न थालेको चर्चा छ । जागिरे मनोवृत्तिबाट माथि उठ्न नसकेपछि प्रधानमन्त्री यिनीबाट दिक्क भएको स्रोतको दावी छ । 

 

शक्ति बस्नेत– मन्त्री भनेपछि र्याल चुहाइहाल्ने स्वभावका शक्ति बस्नेत पोर्टफोलियोबाट तल गिरेर वन मन्त्रालयको जिम्मेवारी सम्हालिरहेका छन् । यिनी यसअघि गृहमन्त्री भइसकेका थिए । पहिलेका सरकार, समुदायको बलमा नेपालको वन जोगिएको छ । तर वनको लाभ मुलुकले पाएको छैन । यि मन्त्रीको एकमात्रै काम जागिर खानु र कुर्सीमै टाँसिएर कुर्सी पुरानो पार्नुबाहेक देखिएन । ‘थपनाकै लागि त अखिलको फुच्चेलाई नै लगेर राखे पनि भइगयो नी’ भन्ने परिस्थितिमा प्रधानमन्त्री ओली पुगेका छन् । 

काम देखाउन नसकेका अन्य जागिरे मन्त्रीहरु 
१.इश्वर पोखरेल– रक्षामन्त्री 
२.उपेन्द्र यादव– स्वास्थ्यमन्त्री 
३.मातृका यादव –उद्योग, वाणिज्य तथा आपूर्ति
४. थममाया थापा –महिला बालबालिका
५.इश्तियाक राई– सहरी विकास 
६.जगतबहादुर सुनार– खेलकुद