ललितपुर । यूएई विरुद्धको एकदिवसीय र टी- २० सिरिज जितेर स्वदेश फर्किएको नेपाली राष्ट्रिय क्रिकेट टोलीलाई नेकपा अध्यक्ष पुष्पकमल दाहाल ‘प्रचण्ड’ले बधाई तथा शुभकामना दिएका छन् । अध्यक्ष प्रचण्डले आज मंगलबार खुमलटारस्थित निवासमा बोलाएर राष्ट्रिय टीमका खेलाडीलाई बधाई दिएका हुन् ।

नेपाली राष्ट्रिय क्रिकेट टीमले विश्वमा नेपालको सम्मान र इज्जत बढाउन सफल भएको भन्दै अध्यक्ष प्रचण्डले नेपालको ऐतिहासिक जीतले खुशी भएको बताए । देश समृद्धिको यात्रामा अघि बढेको बेला राष्ट्रिय एकतालाई मजबुत गर्न क्रिकेट खेलमा भएको प्रगतिले ठूलो भुमिका खेलेको उनको भनाई थियो ।

अध्यक्ष प्रचण्डले राज्यले खेल क्षेत्रलाई विशेष महत्व दिएको र चितवनमा बन्ने स्टेडियमबाट क्रिकेट खेलको विकासमा झन योगदान पुग्ने उनले बताए । आफ्नो तर्फबाट यो क्षेत्रको विकास र खेलाडिको मनोबल उच्च राख्न सक्दो सहयोग गर्ने समेत अध्यक्षले बताए । अध्यक्षलाई भेटन नेपाली राष्ट्रिय टोलिका खेलाडी खुमलटार पुगेका थिए ।