विराटनगर। समुह 'ए' को विजेता बन्दै नेपालले पाँचौ साफ महिला च्याम्पियनसिपको सेमिफाइनलमा स्थान पक्का गरेको छ। शनिवार सम्पन्न समुह चरणको अन्तिम खेलमा नेपालले बंगलादेशलाई ३-० गोल अन्तरले हराएको छ ।

विराटनगरस्थित शहीद रंगशालामा बंगलादेशको आत्मघाती गोलका कारण १-० को अग्रता कायम गरेको खेलमा सावित्रा भण्डारी र मञ्जली कुमारी योञ्जनले एक एक गोल थप्दै नेपाललाई खेलमा ३-० को अग्रतामा पुर्यायो जुन खेलको अन्तिम नतीजा बन्यो ।

बंगलादेशकी मसुरा प्रविनले पाँचौं मिनेटमा आत्मघाती गोल गरेकी थिइन् । २१औं मिनेटमा सावित्रा भण्डारीले गोल गर्दा नेपालले २–० को अग्रता लिएको थियो । सावित्राको पासमा मञ्जलीले २८ औं मिनेटमा गोल गर्दै नेपाललाई पहिलो हाफ अघि ३–० को अग्रता दिलाइन् । दोस्रो हाफमा गोल हुने अवसर पाउदा पनि दुवै टोलीले त्यसको सदुपयोग भने गर्न सकेन । समुह 'बी' को अन्तिम खेलमा भोली भारत र श्रीलंका विच प्रतिस्पर्धा हुनेछ ।