भेनेजुएला प्रकरणमा अमेरिकाबिरुद्ध वक्तव्य जारी गर्ने नेकपा अध्यक्ष पुष्पकमल दाहाल ‘प्रचण्ड’ आफै अमेरिका जाँदैछन् । पत्नी सीता दाहालको उपचारको बाहनामा अध्यक्ष दाहाल अमेरिका जान लागेका हुन् । 

राजनीतिक विश्लेषक भरत दाहालका अनुसार अमेरिकाले दाहाललाई आफनो रणनीतिबारे ‘कोच’ दिन अमेरिका बोलाएको हो । यसअघि भेनेजुएला प्रकरणमा अमेरिकाकै निर्देशनमा प्रचण्डले वक्तव्य जारी गरेको कुरा अहिले आएर पुष्टि भएको उनी बताउँछन् । 
‘अमेरिकालाई साम्राज्यवादी भन्दै आएका प्रचण्ड के अहिले पनि सोही अडान राख्छन् ? अमेरिकाबाहेकका देशमा सीताको उपचार हुँदैन ?’ दाहालको प्रश्न छ । 

 

सीके राउतमार्फत खतरनाक खेल

 

सरकारले हालै सीके राउत नेतृत्वको स्वतन्त्र मधेश गठवन्धनसंग गरेको ११ बुँदे सम्झौता पश्चिमाहरुकै डिजाइनमा भएको दाहालको तर्क छ । राउतमार्फत मधेशका जिल्ला मात्र होइन भारतको बिहारलाई समेत अस्तव्यस्त बनाउने दाउमा पश्चिमा शक्ति लागेको उनको दाबी छ । 
दाहाल भन्छन्, ‘पश्चिमा शक्तिहरुको कब्जामा सरकार परिसकेको र त्यसमा मुख्यतः प्रधानमन्त्री केपी शर्मा ओली र प्रचण्ड प्रयोग भैरहेका छन् । ’

 

प्रचण्ड र ओलीले आफैलाई मार्ने हल्ला फिंजाए

 

अहिले प्रधानमन्त्री ओली र प्रचण्डलाई बिप्लव समूहले मार्न खोजेको हल्ला सरकारले नियोजितरुपमा फिंजाएको हो । भित्रभित्रै खतरनाक राष्ट्रघाती काम भैरहेकाले त्यसबाट जनताको ध्यान अन्यत्र मोड्न यस्ता फण्डाहरु उनीहरुले मच्चाइरहेका छन् । 

 

प्रधानमन्त्री ओली र प्रचण्डबीचमै पनि अन्तर संघर्ष चलिरहेकाले ओलीले नियोजितरुपमा प्रचण्डलाई घेराबन्दीमा राख्न पनि यस्तो डिजाइन रचेका हुन सक्छन् । प्रचण्ड आफै रक्तपातको इतिहास बोकेका मान्छे भएकाले त्यो भयबाट सधैं त्रसित भएको परिणामका रुपमा पनि यो आएको हुनसक्ने दाहालको विश्लेषण छ । 

 

१६ बर्षपछि नेपाल नरहने चिन्ता

 

संसदमा प्रस्तुत नागरिकता बिधेयक यदि पारित हुने हो भने १६ बर्षपछि नेपालमा खास नेपाली रहने छैनन् । यो बिधेयकमा बिदेशी नागरिकहरुलाई नेपाली नागरिकता दिने प्रावधान एकदम खुकुलो राखिएकाले बिदेशीले मात्रै नागरिकता पाउने छन् । 

 

दाहाल भन्छन्, ‘यो सरासर बिदेशीलाई नागरिकता दिने योजना अन्तर्गत ल्याइएको बिधेयक हो । यो बिधेयक पास भए तिब्बती, रोहिंग्या, भारतीय लगायत थुप्रैले सहजरुपमा नागरिकता पाउनेछन् । उनीहरुका सन्तानले बंशजको आधारमा नागरिकता लिनेछन् । त्यसपछि उनीहरु नै राज्यका प्रमुख अंगमा पुग्नेछन् । अनि, चीनलाई सिध्याउन लाग्नेछन् । ’ 

 

‘नेपालीहरु सबै बिदेशमा रोजगारीका लागि भौंतारिनेछन् । यो नेपालीलाई देशबाट खाली गराएर बिदेशीलाई भर्ती गर्ने षडयन्त्र हो । यो बिधेयक पारित गराउन संसदमा, संसदीय समितिमा, अधिकारकर्मीका नाममा जताततै बिदेशी दलाल र चरित्रहीनहरु सक्रिय छन् । यही अनुसार भए, १६ बर्षपछि बिदेशमा रहेको नेपालीलाई आफनै देश फर्किन समस्या हुन्छ । उनीहरुले यीनै बिदेशीबाट अनुमति लिनुपर्ने हुन्छ । ’

 

अब सेनाले भूमिका खेल्नुपर्छ

 

राजनीतिक दलहरुले देशको लागि नभई बिदेशीहरुका लागि मात्र काम गरेपछि अब निकासका लागि सेनाले भूमिका खेल्नुपर्ने स्थिति आएको छ । यसका लागि १२ बुँदे समझदारीमा संलग्न नभएका राजनीतिक शक्तिहरु र  बिभिन्न दल भित्र रहेका राष्ट्रप्रेमी नेताहरुबीच मोर्चाबन्दी आवश्यक छ । 
‘अहिलेका दल र तीनका नेताहरुप्रति जनसमर्थन नभएकाले नयाँ शक्तिले मुलुकको भविश्य कोर्नेमा म आशावादी छु । ’ दाहाल भन्छन् ।