काठमाडौं। चिकित्सा शास्त्र अध्ययन संस्थान (आईओएम)को डीन कार्यालयमा विद्यार्थीहरुले तालाबन्दी गरेका छन् ।

सत्तारुढ नेपाल कम्युनिष्ट पार्टीनिकट विद्यार्थीहरुसँगसँगै स्वतन्त्र विद्यार्थी युनियनले डीन कार्यालयमा तालाबन्दी गरेको हो । पोखरास्थित गण्डकी मेडिकल कलेज र किष्ट मेडिकल कलेजले विद्यार्थीहरुबाट अतिरिक्त शुल्क असुलेको हुँदा पनि विश्वविद्यालय र डीन कार्यालय मौन बसेका कारण तालाबन्दी गरेको विद्यार्थीहरुले जनाएका छन् ।

कलेज सञ्चालकहरुले विद्यार्थीलाई परीक्षाबाट बञ्चित गर्ने धम्की दिएर मुद्धा फिर्ता लिन मनोवैज्ञानिक प्रभावसमेत पारेको अखिल र अखिल (क्रान्तिकारी) र स्ववियुले आरोप लगाएको छ । परीक्षा फाराम भर्ने अन्तिम मिति यही चैत ८ गतेसम्म पनि विद्यार्थीले अन्योलताका कारण फारम भरेका छैनन् । विद्यार्थीको भविष्यसँग खेलवाड गरेर फरार गण्डकी मेडिकल कलेजका संचालक खुमाप्रसाद अर्याललाई तत्काल पक्राउ गर्न उनीहरुको माग छ ।

आफ्ना माग पुरा गर्न विद्यार्थीहरुले ७२ घण्टाको अल्टिमेटम दिएका छन् । माग पुरा नभए कडा रुपमा प्रस्तुत हुदै त्रिवि उपकुलपतिको कार्यायल र डीन कार्यालयमा डीनलाई प्रवेश निषेध गर्ने र राजीनामा माग्ने उनीहरुको चेतावनी छ ।