हैदरावादद्वारा कोलकतासामु १ सय ८२ रनको लक्ष्य प्रस्तुत
इन्डियन प्रीमियर लिग (आईपीएल) को दोस्रो खेलमा सनराइजर्स हैदरावादले कोलकता नाइट राइडर्सलाई १ सय ८२ रनको लक्ष्य दिएको छ ।
कोलकताको इडेन गार्डेन रंगशालामा टस हारे ब्याटिङको निम्तो पाएको हैदरावादले निर्धारित २० ओभरमा ३ विकेटको क्षतिमा १ सय ८१ रन बनायो । हैदरावादका लागि ओपनर डेविड वार्नरले सर्वाधिक ८५ रन बनाए । ५३ बलको सामना गरेका वार्नरले ३ छक्का तथा ९ चौका प्रहार गरे । २४ बलमा २ छक्का तथा २ चौकाको मद्दतले विजय शंकरले नटआउट ४० रन बनाए भने अर्का ओपनर ३५ बलमा ३ चौक्का तथा १ छक्काको मद्दतले ३९ रन बनाए । मनिस पाण्डेले नटआउट ८ रन तथा युशुफ पठानले १ रन बनाएका थिए ।
कोलकताका आन्द्रे रशेलले २ तथा पियुश चावलाले १ विकेट लिएका थिए । आजै हुने अर्को खेलमा नेपाली युवा लेग स्पिनर सन्दीप लामिछानेको टोली दिल्ली क्यापिटल्सले मुम्बई इन्डियनको सामना गर्नेछ । हिजो भएको पहिलो खेलमा चेन्नई सुपर किंग्सले रोयल च्यालेञ्जर्स बैंगलोरलाई पराजित गरेको थियो ।
आईपीएल
