अध्यात्म र विज्ञानका सेतू १११ वर्षे नेपाली बाबा
यी सबै सामग्रीहरू पब्लिक न्युज एजेन्सी (www.publicnewsagency.com)बाट साभार गरिएको हो। तपाईंहरूले पनि आफूलाई आवश्यक पर्ने सामग्रीहरू पब्लिक न्युज एजेन्सीमा निःशुल्क खाता खोलेर साभार गर्न सक्नुहुने छ। साथै पब्लिक न्युज एजेन्सीका लागि समाचार सामग्री र विभिन्न संघसंस्थाका प्रेस विज्ञप्ति पनि सम्प्रेषण गर्न सक्नुहुने छ।
पाशुपत क्षेत्रभित्रको आर्यघाट । जतिसुकै तेज गतिमा दौडिने जीवन पनि यहाँ नबिसाई प्रकृतिको कोर्स पूरा हुँदैन । दैनिक दर्जनौं नश्वर शरीर खरानी भइरहेका छन् । स्वजन बम्ह्लीन हुँदाको विक्षिप्त पीडामा छटपटिनेको संख्या पनि उत्तिक्कै छ । छोराले आफ्नै जन्मदिने बाबुलाई मुखाग्नि दिएर बिदाई गर्नुपर्ने अन्तिम सत्यको यो घाटलाई साक्षी बनाएर एउटा १ सय ११ वर्षको दिव्यपुरुष एक शताब्दीदेखि जीवनको जोड घटाउमा व्यस्त छ ।
यो उमेरमा पनि उसले जीवनको हिसाब मिलाउन सकेको छैन् । जीवनको उत्तराद्र्धमा उसले जीवनको सपाट उत्तर पाएको छैन । कति जित्यो, कति हार्यो ? त्यसको पनि हिसाब किताब छैन । आत्मा र परमात्मालाई जोड्ने सेतू बनेर उभिएको त्यो अद्भूत पात्र डा. त्यागीनाथ अर्थात नेपाली बाबा मानवताको दीयो बालेर बसेका छन् ।
२४ घण्टा आँखा अगाडि मृत्युको विस्कुन देख्दा पनि उनको जडभरत व्यक्तित्वमा कुनै प्रभाव परेको छैन् । त्यसैले त जन्म र मृत्युलाई फगत प्रकृतिको पात्रोको रुपमा बुझेका छन् । भारतमा जन्मिएको एउटा बालक डा. रामनाथ अघोरीबाबाको नाम पछ्याउँदै काठमाडौं हानियो । रामनाथ अघोरी राजा त्रिभुवनका समेत गुरु थिए । गुरुभक्तिस्वरूप राजा त्रिभुवनले आश्रममा मन्दिर बनाइदिए, जुन अहिले पनि देख्न सकिन्छ । पशुपति आर्यघाटको सम्पूर्ण चिता तिनै अघोरीबाबाले बनाएका थिए । त्यसको जीर्णोद्धार र सुधारमा त्यागीनाथ बाबा अहिलेसम्म पनि सक्रियतापूर्वक लागिरहेका छन् । तत्कालीन युवराज महेन्द्रलगायत राजपरिवारका सदस्यहरू बाक्लै आश्रममा आइरहन्थे । राजा महेन्द्रप्रति उनको विशेष श्रद्धा रहेछ ।
त्यो उत्साही किशोरलाई गुरुको मन जित्न कति पनि समय लागेन । अध्यात्म र विज्ञानलाई जोड्ने कडी खोज्दै दिनरात अध्ययन, चिन्तनमा लाग्यो । गुरुको सानिध्य र ठूलाबडाको संगतबाट माझिँदै गयो । अध्यात्म हुँदै उनको पठनपाठन आयुर्वेदिक उपचारतर्फ मोडियो । काठमाडौं र पटना आयुर्वेद कलेजमा उनले आयुर्वेदिक उपचार पद्दतिको ज्ञान लिए । एकपटक आयुर्वेद विभागको निर्देशककी बुहारी गम्भीर बिरामी भइन् । लाइसेन्स थिएन । मौका चौका हान्दै उनले सर्त तेर्स्याए– मलाई लाइसेन्स दिनुस, म तपाईंकी बुहारी निको पारिदिन्छु । कुरो मिल्यो, त्यागीनन्दले डा. उपाधि पाए, निर्देशककी बुहारी तन्दुरुस्त भइन् ।
सानैदेखि बैराग्य लागेर घर छोडेका त्यागीनन्द एकपटक पनि घर फर्किएनन् । एउटा जीवन त्यागेर, अर्को जीवनमा प्रवेश गरेपछि काम, क्रोध, मोह त्याग्नुपर्छ भन्ने लाग्यो । घर छोड्दा त्यागीनन्दका पिताको विहारमा आठ हजार विघा जग्गा जमिन थियो । सम्पत्ति त परै रह्यो, गृहस्थी गर्ने सोचसम्मले प्रवेश पाएन । नेपाली बाबा नामले भारतमा पनि उनको ठूलो ख्याती छ । लिनुको विकल्प दिनुलाई जीवनको दर्शन बनाएका नेपाली बाबाले लाखौं चन्दा दिएर धार्मिक थलोको जिर्णोद्धार र नवनिर्माण गरेका छन् ।
डाक्टर त्यागीनाथ बाबाको जीवन दर्शन आम मानिसको भन्दा पृथक छ । बाबाले पशुपतिनाथ, विराटनगर, सुनसरीको बराहक्षेत्र, जनकपुरधाम, धरानको पिण्डेश्वरीजस्ता धार्मिकस्थलमा आफ्नै सक्रियतामा थुप्रै भौतिक संरचना बनाएका छन् । सांसारिक मोहबाट टाढा भएका, घरपरिवार उहिल्यै छाडेका सन्तलाई हामीले सोध्यौं– तपाईंको आम्दानीको श्रोत चाहिँ के हो त ? उनले दयालु दाताहरू भएको बताए ।
बाबाका दिव्यदृष्टि ज्योति, आरोग्य दर्शन, मृत्यु विचार, नयाँ युग, रुद्राक्ष महत्वजस्ता ६ वटा पुस्तक प्रकाशित छन् । आफूलाई सम्झिएर आउनेको अहिले पनि निशुल्क उपचार गर्छन् । तर यस्ता कर्मयोगीले किन चेलाचपाटी जन्माएनन त ? किनभने उनलाई जीवनमा चेलाहरुको मोह भएन । विशेषणको जोगी भए पनि सस्ता र कर्महारा जोगीलाई घृणा गर्छन् । माछा, मासु, रक्सी, भाङ, धतुरोको सेवनले जोगी बिग्रिएको निष्कर्ष निकालेका नेपाली बाबा भन्छन् – जो भए पनि काम नगर्नेलाई माम दिनुहुन्न ।
नेपाली बाबा सिद्धहस्त तान्त्रिक हुन् । तन्त्रमा सिद्ध पाउन शुद्ध उच्चारण पहिलो सर्त भएको बताउँछन् । भूतप्रेत प्रति अलिकति पनि विश्वास छैन् । अघोरीबाबाका नाममा मान्छेको मासु खाने भनेर आतंक मच्चाउनेहरू प्रति उनको गम्भीर आपत्ति छ । उनी भन्छन् – यी सब नाटक हुन् । भारतको उत्तरप्रदेशका मुख्यमन्त्री आदित्यनाथ र आफू एउटै सम्प्रदायको बताउने नेपाली बाबा भन्छन् – आदित्य मेरा भतिजा चेला पर्छन् ।
१ सय ११ वर्षसम्म स्वस्थ जीवन पाएका नेपाली बाबाको दीर्घजीवनको रहस्य के हो त ? एउटा चिकित्सकको नाताले कस्तो आहारविहारको सल्लाह दिनुहुन्छ ? डा. त्यागीनाथको दृष्टिकोण यस्तो छ ।
जोगीलाई सुरक्षाको चिन्ता ? यसोभन्दा अप्ठ्यारो सुनिन सक्छ । हो, नेपालीबाबा सुरक्षाका कारण तनावमा छन् । सस्ता मानिस आएर आफ्नो आश्रममा गर्ने सस्तो व्यवहार उनलाई विझाउन थालेको छ । यो काँडा पन्साइदिन जोकोहीसँग उनी अनुनय विनय गर्छन् । शताब्दी नाघेका यी आदर्णीय व्यक्तित्वको माग पूरा गर्नु जो कसैको धर्म हो ।
जोगी आर्यघाट डा. त्यागीनाथ पाशुपत क्षेत्र
