दुई दशकदेखि ड्राइभिङ पेशामा लागेका मिश्रले ‘लप्पन छप्पन २’ निर्माण गर्ने
काठमाडौं । करिब दुई दशकदेखि ड्राइभिङ पेशामा आबद्ध निर्मल मिश्रले फिल्म ‘लप्पन छप्पन २’ निर्माण गर्ने भएका छन् । फिल्मको छायांकन यूरोप र अष्ट्रेलियामा हुनेछ । फिल्ममा सौगात मल्ल, दयाह्याङ राई, अर्पण थापा र मिस नेदरल्याण्ड केरोलिन कोरिन्डाको मुख्य अभिनय रहेको छ ।
‘लप्पन छप्पन’को सिक्वेल रहेको यस फिल्ममा पुराना कलाकारमा बर्षा सिवाकोटी बाहिरिएकी छिन् । उनलाई मिस नेदरल्याण्डले रिप्लेस गरेकी हुन् । फिल्ममा निर्माता मिश्र आफैंको पनि अभिनय रहनेछ । निर्मलसँगै प्रकाश कुँवरपनि कार्यकारी निर्माता हुन् ।
फिल्ममा देव कुमार, सुरविना कार्की, सृजना सिनालगायतका कलाकारहरुको पनि अभिनय रहनेछ ।
अर्को वर्षको महाशिवरात्रीमा प्रदर्शनमा ल्याउने तयारी भइरहेको फिल्मलाई मुकुन्द भट्टले निर्देशन गर्नेछन् । कथा, पटकथा र संवादमा निर्देशक भट्टलाई अमित शर्मा र विवेक पाण्डेले सघाएका छन् । पुरुषोत्तम प्रधानले खिच्ने फिल्मलाई सुरेन्द्र पौडेलले सम्पादन गर्नेछन् ।
इपी एजुकेशन अष्ट्रेलिया र गोल्डेन हिल्स् पिक्चरको संयूक्त ब्यानरमा बन्ने फिल्ममा राजेन्द्र भट्ट (मिस्टर आरजे), शम्भुजित बाँस्कोटा र दिपक आरजेको संगीत रहनेछ । फिल्ममा सिमोस तामाङ एक्सन डाइरेक्टरको रुपमा अनुबन्ध भएका छन् भने एक्सन डिजाइनरमा हिमाल केसी छन् । यसमा शैलेस श्रेष्ठले ब्याकग्राउण्ड स्कोर गर्नेछन् ।
