काठमाडौं । इन्डियन प्रिमियर लिग (आइपीएल) मा विराट कोहली कप्तान रहेको रोयल च्यालेन्जर्स बैंग्लोरले लगातार दोस्रो हार बेहोरेको छ । मुम्बई इन्डियन्ससँग ६ रनले पराजित हुँदै १२औं संस्करणको आइपीएलमा बैंग्लोरले लगातार दोस्रो हार बेहोरेको हो ।

 

बिहीबार राति भएको खेलमा मुम्बईले दिएको १८८ रनको लक्ष्य पछ्याउने क्रममा  बैंग्लोरले निर्धारित २० ओभरमा ५ विकेट गुमाउँदै १८१ रन बनायो । उसका लागि एबी डी विलियर्सले नटआउट ७० रन बनाए पनि टिमलाई जिताउन सकेनन् । यस्तै, कप्तान कोहलीले ४६, पार्थीव पटेलले ३१, मोइन अलीले १३ रन जोड्नुबाहेक अन्यको प्रदर्शन सम्झनलायक भएन ।

 

बलिङमा मुम्बईका जसप्रित बुमराहले ३ विकेट लिँदै म्यान अफ द म्याच घोषित भए । अन्तिम ओभरमा बैंग्लोरलाई जीतका लागि १७ रन चाहिएको थियो । यो ओभरको पहिलो बलमै बैंग्लोरका शिवव दुवेले छक्का प्रहार गरे । तर, बाँकी ५ बलमा बाउन्ड्री आउन नसक्दा बैंग्लोर पराजित हुनपुग्यो । 

 

यसअघि, टस हारेर बलिङको मौका पाएको मुम्बईले निर्धारित २० ओभरमा ८ विकेट गुमाउँदै १८७ रन बनायो । उसका लागि कप्तान रोहित शर्माले ४०, शूर्यकुमार यादवले ३८, युवराज सिंह, क्विन्टन डी ककले २३–२३ रन बनाए । यस्तै हार्दिक पाण्ड्याले १४ बलमा ३२ रन बनाए । त्यसक्रममा उनले ३ छक्का र २ चौका प्रहार गरे । बलिङमा बैंग्लोरका युजवेन्द्र चहलले ४, उमेशकुमार यादव र मोहम्मद सिरिजले दुई–दुई विकेट लिए ।

 

विराटको ५ हजार रन पूरा
रोयल च्यालेन्जर्स बैंग्लोरका कप्तान विराट कोहलीले पनि आज आइपीएलमा ५ हजार रन पूरा गरेका छन् । उनले १६५ खेलमा ५ हजार पूरा गरेका हुन् । विराटले मुम्बईविरुद्ध आज ४६ रन बनाएसँगै ५ हजार रन पूरा गरे । विराट आइपीएलमा ५ हजार रन पूरा गर्ने दोस्रो खेलाडी हुन् । संयोग त के भने आज विराट मुम्बइविरुद्धको खेलमा ५ हजार रन बनाएसँगै आउट भए । उनलाई जसप्रित बुमहराहले ४६ रनमा आउट गर्न सफल भए । यसअघि, आइपीएलमा सुरेश रैनाले ५ हजार रन पूरा गरिसकेका छन् ।

 

डी विलियर्सको ४ हजार रन
आइपीएलमा रोयल च्यालेन्जर्स बैंग्लोरबाट खेल्ने एबी डी विलियर्सले मुम्बईविरुद्ध शानदार प्रदर्शन गरे । उनले नटआउट ४१ बलमा ७० रन प्रहार गरे । यद्यपी टिमलाई भने जिताउन सकेनन् । आइपीएलमा उनको यो २९औं अर्धशतक हो । यो रनसँगै डी विलियर्सले आइपीएलमा ४ हजार रनसमेत पूरा गरे । उनी आइपीएलमा ४ हजार रन पूरा गर्ने तेस्रो विदेशी खेलाडी हुन् । 

 

पहिलो खेलमा बैंग्लोरले चेन्नई र मुम्बईले दिल्लीसँग हार बेहोरेको थियो ।बिहीबारकाे खेलमा विराटको टिमले चेन्नई विरुद्ध खेलेको टोलीलाई नै मैदान उतारेको थियाे । यता, मुम्बईले भने २ खेलाडी परिवर्तन गर्यो । उसले बेन कटिङ र रासिख सलामलाई विश्राम दियाे । उनीहरुको स्थानमा मयंक मार्कडे र लसिथ मलिंगालाई मौका दिएको थियाे । यस्तो थियो दुवै टिम–

 

बैंग्लोरः विराट कोहली (कप्तान), पार्थिव पटेल (विकेटकीपर), मोईन अली,  एबी डि विलियर्स, शिमरोन हेटमेयर,  शिवम दूबे, कोलिन डी ग्रैंडहोम,  नवदीप सैनी,  युजवेद्र चहल,  उमेश यादव र मोहम्मद सिराज ।

 

मुम्बई इन्डियन्सः रोहित शर्मा (कप्तान), क्विन्टन डी कक (विकेटकीपर), सूर्यकुमार यादव, युवराज सिंह, कीरोण पोलार्ड, हार्दिक पांड्या, क्रुणाल पांड्या,  मयंक मार्कंडे,  मिशेल मैक्लेनाघन, लसिथ मलिंगा, र जसप्रीत बुमराह ।

आइपीएल बैंग्लोर भर्सेस मुम्बई