काठमाण्डौं। चेन्नई सुपर किंग्सका कप्तान महेन्द्र सिंह धोनीलाई गएराति भएको राजस्थान रोयल्सविरुद्धको खेलको ५० प्रतिशत म्याच फी जरिवाना तिराइएको छ ।

खेल जारी रहदा मैदानभित्र प्रवेश गरेर अम्पायएरसँग उग्र रुपमा व्यवहार गरेपछि धोनीलाई आचार संहिताको उल्लङ्घन गरेको आरोपमा जरिवाना भएको हो । राजस्थानविरुद्ध अन्तिम ओभरमा रोमाञ्जक खेल जारी रहदा "नो बल" को विवादका कारण उनी मैदान प्रवेश गरेका थिए ।

१ सय ५२ रनको लक्ष्य पछ्याइरहेको चेन्नईलाई ३ बलमा ८ रनको आवश्यकता थियो । क्रिजमा थिए मिचेल स्यान्टनर र रविन्द्र जडेजा । स्ट्राइकमा स्यान्टनर अनि बलिङमा बेन स्टोक्स । स्टोक्सले बल फाले अनि उचाइका आधारमा अम्पायरले नो बलको इशारा गरे । एकछिन थर्ड अम्पायरसँगको संवादपछि अम्पायरले निर्णय सच्याउदै सहि बल भएको बताए लगत्तै धोनी उग्र भए । पहिला मैदानबाहिरै रिसाएको व्यवहार देखाएका उनी एकछिन पछि मैदानमा प्रवेश गरे ।

ब्याटिङ टोलीका कप्तान अम्पायरसँग छलफल गर्न मैदानमै पुग्नु यो पहिलो घटना भएको क्रिकेटका जानकारहरु बताउछन् । आफ्नो नरम स्वभावका कारण "क्याप्टेन कुल" को उपमा पाएका धोनी यसरी उग्र भएको यो सम्भवत पहिलो घटना हो । उक्त खेल अन्तिम बलमा चेन्नइले जितेको थियो । खेलका म्यान अफ दि म्याच धोनी नै भएका थिए ।