काठमाडौं। इन्डियन प्रिमियर लिग (आइपीएल) मा आज चेन्नई सुपर किंग्स र सनराइजर्स हैदरावाद भिड्दैछन् ।

 

नेपाली समयअनुसार बेलुका सवा ८ बजे चेन्नईस्थित एमए चिदम्बरम रंगशालामा सुरु हुने खेल दुबै टोलीका लागि महत्वपूर्ण हुनेछ । आजको खेलमा जित निकाल्दै घरेलु टोली चेन्नई प्लेअफमा आफ्नो स्थान पक्का बनाउने रणनीतिमा हुनेछ भने हैदरावाद अङ्क तालिकामा तेस्रो स्थानमा बढुवा हुने दाउमा हुनेछ ।

 

यसअघि कप्तान महेन्द्र सिंह धोनीबिनाको चेन्नईले हैदरावादसामु निरीह बनेको थियो । हैदरावादमा भएको उक्त खेलमा घरेलु टोलीले जित निकालेको थियो ।  चेन्नई आज जितको बदला लिने दाउमा हुनेछ । यस संस्करणको पहिलो भिडन्तमा हैदरावादले जित निकालेपनि गत संस्करणमा ४ पटक भिडन्त हुँदा पनि हरेक खेल चेन्नईले जितेको थियो ।

 

पछिल्ला ५ खेलमा दुई टोलीका महत्वपूर्ण खेलाडी मानिने हैदरावादका डेविड वार्नर र चेन्नईका महेन्द्र सिंह धोनीमध्ये एक जना अनुपस्थित नै थिए । दुवै खेलाडी आज आमनेसामने हुँदा खेल रोमाञ्चक हुनेछ ।