काठमाडौं। एसीसी यु–१६ इस्टर्न रिजन क्रिकेट प्रतियोगिता अन्तर्गत आफ्नो दोस्रो खेलमा नेपालले मलेसियालाई  ३९ रनले हराएको छ ।

 

थाईल्याण्डको चियाङ माईस्थित प्रेम तिन्सुलानोन्डा मैदानमा भएको खेलमा नेपाल मलेसयिालाई पराजित गर्दै समुह 'ए' को शीर्ष स्थानमा कायम रहेको छ । टस जितेर पहिला ब्याटिङ गरेको नेपाल ३४.५ ओभरमा १ सय ४१ रन बनाउदै अलआउट भएको थियो । नेपालका लागि आशिष भट्टराईले सर्वाधिक ३४ रन बनाए भने कप्तान विशाल विक्रम केसीले २८ रन, दिपक बोहरा र अर्जुन कुमालले समान १६/१६ रन बनाए । मलेसियाका सिद्धार्थ कार्तिकले ४ तथा लोकमान नुर र सचिनु हेटिगेले समान २/२ विकेट लिए ।

 

१ सय ४२ रनको लक्ष्य पछ्याएको मलेसियाले ३३.२ ओभरमा सबै विकेट गुमाउदै जम्मा १ सय २ रन बनाउन सक्यो । मलेसियाका लागि शर्वीन सुरेन्द्रनले सर्वाधिक नटआउट ४६ रन बनाए । वान अहमद असिरफले १७ तथा किशन कुमार ११ रन बनाउँदा अन्य ब्याट्सम्यानले दोहोरो अंकमा जोड्न सकेनन् । नेपालका प्रशान्त महत, रमेश कुर्मी र तिलकराज भण्डारीले समान २/२ विकेट लिए भने प्रशान्त सिंह र निखिलकुमार सिंहले समान १/१ विकेट लिए ।