सन २०२० मा जापानको टोकयोमा हुने ओलम्पिक गेम्सको महिला फुटबल छनोटको दोस्रो चरणको खेलमा नेपाल म्यानमारसँग ३-१ गोल अन्तरले पराजित भएको छ ।

घरेलु टोली म्यानमारको मन्दालार थिरी रंगशालामा भएको खेलमा आफुभन्दा बलियो प्रतिद्वन्द्वीविरुद्ध खेलमा नेपालले पराजय बेहोरेको हो । खेलको २३ औं मिनेटमा म्यानमारले नेपालविरुद्ध पहिलो गोल गरेको थियो । पहिलो हाफको समाप्तिमा नेपालले स्कोरबोर्ड १-१ को बराबरीमा पुर्याएको थियो । पहिलो हाफको इन्जुरी समयमा नेपालकी कप्तान निरु थापाले गोल गर्दै खेल बराबरीमा ल्याएकी थिइन् ।

दोस्रो हाफको सुरुवातमा नै म्यानमारले गोल गर्दै खेलमा अग्रता कायम गर्न सफल भयो । अन्तिममा इन्जुरी समयमा पुन: एक गोल थप्दै म्यानमारले ३–१ ले खेल जित्यो ।