विदेशीलाई नागरिकता दिन ढिलो नहोस् भनेर गृहले परिपत्र गर्यो (भिडियोसहित)
काठमाडौं । राष्ट्रिय जनमोर्चाका अध्यक्ष चित्रबहादुर केसीले ऐन बनाएर नागरिकता बाँड्दा विदेशीलाई मर्का पर्ने ठानेर गृहमन्त्रालयले जिल्ला प्रशासन कार्यालयहरुलाई परिपत्र जारी गरेर वंशज नागरिकता बाँड्न थालेको दावी गरेका छन् ।
अंगीकृतका सन्तानलाई वंशज नागरिकता बाँड्न गृहको परिपत्र दूर्भाग्यपूर्ण रहेको दावी गर्दै अध्यक्ष केसीले वताए । यस्तो परिपत्रपछि धेरैले नागरिकता लिइरहेको उल्लेख गरे । पुस्तौपुस्तादेखि नेपालमा बसिआएका वास्तविक धर्तीपुत्रले मात्रै वंशजको नागरिकता पाउनु पर्ने उनको माग छ । नेपाली चेली भारतमा बिवाह गरेर जाँदा त्यहाँ सात वर्ष पछि मात्रै अंगीकृत नागरिकता पाउँछन् । तर नेपाली केटासँग विवाह गरेर आउने महिलाले तुरुन्तै नागरिकता पाउने व्यवस्था घातक रहेको उनको भनाइ छ ।
बाबुको टुंगो नहुँदा, पहिचान पनि नखुलाउँदा पनि आमाले भनेका भरमा सन्तानलाई नागरिकता दिनु पर्ने संशोधन प्रस्ताव जायज नभएको केसी बताउँछन् । उनले भने, ‘पतिको नाम भन्न पनि लाज लाग्ने वा भन्न नसक्ने अनि नागरिकता भने पाउनु पर्ने कुनै कुरा हुन्छ ?’
पटक पटक विदेशीलाई नागरिकता बाँड्नकै लागि तीन वटा ऐन नेपालमा बनेको र सात वटा नियमावली बनेको केसी बताउँछन् । नेपालमा जनसांख्यिक आक्रमणको संकेत देखा परिसकेको र कुनै पनि बेला नेपालमा जनसांख्यिक आक्रमण हुन सक्ने केसीले दावी गरे ।
भारतमा वर्षौंदेखि लाखौ नेपाली जातीहरु बसेका छन् । तर उनीहरुले नागरिकता पाएका छैनन् । नेपालमा भने तीन जनाले सिफारिस गरेको भरमा नागरिकता बाँडिनु दुःखद पक्ष रहेको उनले उल्लेख गरे ।
(यस समाचारमा समाविष्ट भिडियो प्लेटमा ‘चित्रबहादुर’ र ‘अध्यक्ष’ हुनुपर्नेमा अन्यथा पर्न गएकोले त्यसबाट पाठक, दर्शकवर्गमा पर्न गएको अलमलप्रति क्षमाप्रार्थी छौं ।’
