ऊर्जा, जलस्रोत तथा सिंचाइ मन्त्री वर्षमान पुन "अनन्त" ले सरकारप्रति जनताको विश्वास झन बढेको बताएका छन् ।

मङ्गलबार "जनताको जलविद्युत कार्यक्रम" अन्तर्गत थपिएका दुइ आयोजनाबारे जानकारी दिन मन्त्रालयमा आयोजित कार्यक्रममा उनले यस्तो धारणा राखेका हुन् । "जनताको जलविद्युत कार्यक्रम" अन्तर्गत पहिलो आयोजनाको रुपमा त्रिशुली थ्री बीमा लगानी गर्न आम नागरिकको तर्फबाट अत्यधिक आवेदन आउनु त्यसको प्रमाण भएको मन्त्री पुनको विश्वास रहेको छ ।

जनता लगानी गर्न आतुर रहेको बताउदै मन्त्री पुनले जनताले मुनाफा पाउने कार्यक्रम मात्रै अगाडि बढाइने स्प्षट पारे । तत्काल फाइदा नहुने देखियो भने "जनताको जलविद्युत कार्यक्रम" को सुचीमा रहेको केही आयोजना हटाउन पनि सकिने उनको भनाइ छ । अधिकांश आयोजना केही वर्षमै तयार हुने भएकाले सानो पुँजी लगानी गर्ने सर्वसाधारणले तत्काल फाइदा पाउने मन्त्री पुनले स्पष्ट पारेका हुन् ।

रसुवागढी जलविद्युत आयोजना र सान्जेन जलविद्युत आयोजनाले वैशाख ६ गतेदेखि प्राथमिक शेयर ‘आइपिओ’ निष्काशन गर्न लागेको हो । रसुवागढीले सर्वसाधारणको लागि ९३ लाख ३९ हजार ४६७ कित्ता र सान्जेनले ४९ लाख ८२ हजार कित्ता प्राथमिक शेयर जारी गर्ने भएका हुन् ।