काठमाडौं। भारतमा जारी सर्वाधिक लोकप्रिय क्रिकेट फेन्चाइज लिग, इन्डियन प्रिमियर लिग (आइपीएल) अन्तर्गत फाइनल प्रवेशका लागि आज तीन पटकको विजेता चेन्नई सुपर किंग्स र हालसम्म फाइनल प्रवेश गर्न नसकेको दिल्ली क्यापिटल्स भिड्दै छन् ।

 

हैदरावादको विशाखापटनमस्थित डा. वाइ एस राजशेखरा रेड्डी एसिए-भिडिसिए क्रिकेट रगंशालामा जारी खेलमा चेन्नईले टस जितेर पहिला बलिङ गर्ने भएको छ । महेन्द्रसिंह धोनी नेतृत्वको चेन्नई सुपर किंग्सविरुद्ध पनि नेपाली लेग स्पिनर सन्दीप लामिछानेले मौका पाएन । दिल्लीले अघिल्लो खेलमा टिममा राखेका खेलाडीलाइ नै मैदानमा उतारेको छ ।

 

ट्रेन्ट बोल्टको स्थानमा अलराउन्डर क्रिस मोरिसलाई दिल्लीले टिममा समावेश गर्न सक्ने बताए पनि त्यस्तो कुनै परिवर्तन भएन । आजको विजेता टोलीले उपाधिका लागि मुम्बई इन्डियन्सको सामना गर्नेछ ।

 

दिल्लीले हैदरावादविरुद्धको इलिमिनेटर खेल पनि यही मैदानमा खेलेको थियो । जसमा स्पिनरले राम्रो प्रदर्शन गरेका थिए । त्यही लयमा प्रदर्शन गर्न सके दिल्लीले जित्ने प्रवल संभावना हुन्छ भने प्रतिद्वन्द्वी टोलीका कप्तान धोनीको चतुर्याइ भने हेर्न लायक हुनेछ ।