ललित स्मृति फुटबल : एनआरटीको विजयी सुरुवात
काठमाडौँ । चौथो संस्करणको ललित स्मृति यू–१८ फुटबल च्याम्पियनसिपमा न्युरोड टिम एनआरटीले विजयी सुरुवात गरेको छ । बुधबार भएको उद्घाटन खेलमा भ्याली च्यासल युथ क्लबलाई ४–१ गोल अन्तरले पराजित गर्यो । खेलको पहिलो मिनेट मै रिजन माझीले गोल गर्दै एनआरटीलाई अग्रता दिलाएका थिए ।
तर, खेलको ४४ औं मिनेटमा सिराबको गोलबाट च्यासल खेलमा फर्किएको थियो । ललितपुरस्थित एन्फा कम्प्लेक्स सातदोबाटोमा एनआरटीलाई जित दिलाउन रिजन माझी, क्रितिश रत्न छुन्जु, सुजन शर्मा धिताल र विवेक राईले एक एक गोल गरे । च्यासलका सिराब लो तामाङले एक गोल फर्काए ।
दोस्रो हाफमा एनआरटीले लगातार ३ गोल गर्यो । खेलको ५४ औँ मिनेटमा क्रितिशले गोल गर्दै एनआरटीको अग्रता २–१ को बनाए । खेलको ८१ औं मिनेटमा सुजनले गोल गर्दै एनआरटीको अग्रता ३–१ को बनाए । त्यसपछि खेलको ८७ औं मिनेटमा विवेकले गोल गर्दै एनआरटीलाई ४–१ को सहज जित दिलाए । जितसंगै समूह ’ए’ को एनआरटीले महत्वपूर्ण ३ अंक जोडेको छ ।
असार ३१ गतेसम्म चल्ने प्रतियोगितामा ’ए’ डिभिजनका १४ क्लब प्रतिस्पर्धामा छन् । लिग कम नकआउटका आधारमा सञ्चालन हुने प्रतियोगितामा सहभागी टिमलाई तीन समूहमा विभाजन गरिएको छ । समूह चरणका विजेता र उपविजेता सहित उत्कृष्ट २ टिमले नकआउट चरणमा स्थान बनाउनेछन् ।
प्रतियोगितामा थ्री स्टार, मनाङ मर्स्याङ्दी, नेपाल पुलिस, त्रिभुवन आर्मी, एपीएफ, जावलाखेल युथ क्लब, संकटा क्लब, सरस्वती युथ, फ्रेन्ड्स क्लब, भ्याली च्यासल, हिमालयन शेर्पा, मछिन्द्र क्लब , ब्रिगेड ब्वाईज र न्युरोड टिम एनआरटी सहभागीछन् । प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।
एन्फाका पुर्व उपाध्यक्ष ललितकृष्ण श्रेष्ठको स्मृतिमा संघले प्रत्येक बर्ष उमेर समूहको प्रतियोगिता आयोजना गर्दै आएको छ ।
