विश्वकप क्रिकेट अन्तर्गत अष्ट्रेलियाले श्रीलंका सामु ३३५ रनको विशाल लक्ष्य प्रस्तुत गरेको छ ।  दी ओभलमा भइरहेको खेलमा टस हारेर पहिले ब्याटिङ गरेको अष्ट्रेलियाले निर्धारित ५० ओभरमा ७ विकेट गुमाउँदै ३३४ रन पूरा गर्‍यो ।  अष्ट्रेलियाका  लागि कप्तान फिँचले शतकीय पारी खेले ।

१३२ बल खेलेका उनले १५ चौका र ५ छक्काको सहयोगमा १५३ रन पूरा गर्दै शतक बनाउँन सफल भए । एकदिवसीय क्रिकेटमा फिँचको यो १४ औँ शतक हो ।

त्यस्तै स्टिभ स्मिथले अर्धशतकीय पारी खेले । ५९ बल खेलेका उनले ७ चौका र १ छक्काको सहयोगमा ७३ रनको योगदान गरे । अष्ट्रेलियाका लागि ग्लेन म्याक्स्वेल ४६ रन बनाउँदा डेभिड वार्नरले २६ रनको योगदान गरे ।  बलिङतर्फ श्रीलंकाका लागि धनन्जय डि शिल्भा र इसुरु उदनाले समान दुई–दुई विकेट लिए । त्यस्तै लासिथ मालिंगाले एक विकेट लिए ।