दुई विदेशी लुटेर ओशो तपोवन खडा गरिएको थियो (प्रमाणसहित)
काठमाडौं । शिवपुरी–नागार्जुन राष्ट्रिय निकुञ्जको जमिन हडपेर बद्नामी कमाएको ओशो तपोवनको स्थापनाको दुःखलाग्दो कथा फेला परेको छ ।
ओशो तपोवन स्थापनामै जालझेल र विदेशीहरुको रकम अपचलन गरिएको प्रमाण फेला परेको छ । माँ विमला उपनामकी एक जापानी महिला र सत्यतीर्थ भारती उपनामका एक भारतीय सन्यासीहरुको पैसा हिनामिना गरेर अरुणकुमार सिंहसहितको टोलीले लुटको जगमा भ्रमको साम्राज्य स्थापना गरेको भन्दै २९ वर्षअघि नै बबण्डर भएको विषयवस्तु नेपालआजको हात परेको छ ।
घटनाअनुसार ४७ सालतिर आनन्द अरुण भनेर परिचित अरुणकुमार सिंह ताहचलस्थित गाईबाच्छा पार्टीमा ओशो आशिष ध्यान केन्द्र सञ्चालन गर्थे । त्यो बेला ओशो सन्यासी जापानी महिला ‘माँ विमला’ र भारतीय ओशो सन्यासी स्वामी सत्यतीर्थ (भुपाल भारत) नेपाल आएका थिए । उनीहरुमा ओशो शिक्षा पढाउने एक अन्तर्राष्ट्रिय स्कुल सञ्चालन गर्ने इच्छा थियो ।
ती दुई जापानी र भारतीयले एक लाख डलर कानुनी विधिमार्फत नै नेपाल ल्याएका थिए । ताहचलमा अरुणकुमार सिंहसहित कृष्णानन्द भारती, चितवनका ओम भारतीसँगको सहमतिअनुसार जापानी र भारतीयको पैसाबाट जग्गा किन्ने सहमति भयो ।
जसअनुसार धीरेश भारती, ओम भारती र रमेश राजकर्णिकारको नाममा जमिन खरिद गरियो । तर जमिनमा लगानी भने तिनै दुई जापानी र भारतीय नागरिकको थियो । विदेशी सन्यासीले नेपालमा रकम लगानी गरेपछि त्यो जमिनमा कसरी कब्जा जमाउने भन्ने दाउपेच अरुणकुमार सिंहले गरेको देखिन्छ ।
जापानी र भारतीय सन्यासीको रकमबाट व्यक्तिको नाममा खरिद गरिएको जमिनलाई अरुणकुमारले प्रपञ्च गरी व्यक्तिको नाममा रहेको जमिन रातारात लगानीकर्तालाई समेत थाहा नदिई ओशो तपोवनको नाममा विलय गराई दिए । त्यो क्रममा सत्यतीर्थले लगानी गरेको ३२ लाख रुपैयाँसमेत फिर्ता नगरी उनलाई नेपालबाट लखेट्ने कार्य भएको थियो ।
नेपालमा विदेशी मुद्रा कानुनी तवरले नै ल्याइएको भए पनि सटही गर्दा आपसी चिनजानका आधारमा गरिएको थियो । जसका कारण सत्यतीर्थले सो रकमका बारेमा कतै उजुर गर्न सकेनन् । रकम साटिदिने चाहिँ प्रभु बैंकका हालका अध्यक्ष देवीप्रसाद भट्टचन थिए । अरुको पैसा अपचलन गरेर फिर्ता नदिएपछि अरुणकुमार सिंहसँग कृष्णनन्द भारती, देवीप्रसाद भट्टचनहरु रिसाए । उनीहरुले तपोवन जान नै बन्द गरे ।
जालझेल गरेर अरुको सम्पत्ति हत्याउनमा अरुणकुमार सिंहलाई कृष्ण पाउरोटीका सञ्चालक रमेश कर्णिकार उर्फ स्वामी आनन्द रमेशले सघाएका थिए । त्यो जालझेलमा संलग्न भएबापतको पुरस्कार उनले २७ वर्ष यता तपोवनको अध्यक्षको पद पाइरहेका छन् । अरुणकुमार सिंहले अरुको सम्पत्तिमा जालझेल मात्रै गरेरनन्, दाजुभाईबीच फाटो पनि ल्याइदिए । आफ्नो दाई ओम भारतीलाई हटाउन सहयोग गरेबापत स्वामी प्रेम कृष्ण (खेम डल्लाकोटी)भन्नेलाई तपोवनको संचालक बनाए । सिंहले उनलाई आफ्नो कम्पनीमा समेत निर्देशक बनाएका छन् ।
अरुणकुमार सिंहको जालझेल ५५ साल भदौ १० गते लामो एक विज्ञप्ति प्रकाशित गरेर पीडितहरुले सार्वजनिक गरेका थिए । जग्गाधनीहरु ओम भारती, धीरेश भारतीले विज्ञप्ति निकालेर आफूहरु ठगिएको बेलिबिस्तार लगाएका थिए ।
अरुको पैसामा जालझेल गरी खडा गरिएको ओशो तपोवनले लामो समय निकुञ्जको जमिन पनि कब्जामा लियो । तर निकुञ्जले जमिन खोसेपछि अहिले ओशो तपोवन तिनी जापानी र भारतीयको पैसाले खरिद गरेको जमिनमा सिमित भएको छ ।
सरकारी संयन्त्र दूरुपयोग गरेर अरुणकुमार सिंहले निकुञ्जभित्र नै पर्खाल लगाउने, सरकारी पैसाबाटै निकुञ्जभित्र पक्की बाटो बनाउने, त्यो बाटोमा सरकारी भ्रष्ट कर्मचारीदेखि भ्रष्ट नेताहरुलाई भ्रमण गराउने गर्थे ।
विवादास्पद ओशो गुरु अरुणकुमार सिंहलाई अहिले पनि धेरै नेताहरुले काखी च्याप्दै आएका छन् ।
र यो पनि...
बलात्कारी आशाराम बापुसँग स्वामी आनन्द अरुणको अदालतमै तुलना हुँदा...
