काठमाडौँ । संघीय संसदको कृषि, सहकारी तथा प्राकृतिक स्रोत समितिले वन विधेयकबारे विज्ञहरुको राय लिएको छ । 
समितिले मंगलबारको बैठकमा वन विधेयकका सम्बन्धमा विज्ञहरुसँग छलफल गरेको हो । छलफलमा भाग लिदै वन विज्ञ डा. कृष्णचन्द्र पौडेलले वन क्षेत्रमा वन विनाश हुने गरी उद्योग स्थापना गर्ने अनुमति नदिन सरकारलाई सुझाव दिनु भयो । उहाँले वन क्षेत्रमा उद्योग स्थापना भए वन तथा वातावरण दुवै विनाश हुनेतर्फ पनि सरकार र संघीय संसदलाई सचेत गराउनु भयो ।

 

वातावरणविद् कृष्ण ज्ञवालीले विकास र वातावरणलाई सन्तुलित ढंगले अघि बढाउने गरी वन सम्बन्धि कानुनी व्यवस्था गर्नुपर्नेतर्फ सरकारको ध्यानाकर्षण गराउनु भयो । वन क्षेत्रमा हुने पूर्वाधार विकासको कामले समेत वातावरणमा प्रतिकूल असर परिरहेकाले त्यस्तो अवस्था आउन नदिने गरी कानूनी व्यवस्था गर्न सरकारलाई उहाँको सुझाव छ ।

 

वन विज्ञहरुले वनको व्यवस्थापन गर्दा त्यहाँको पशुपंक्षी तथा जीवहरुको सुरक्षामा पनि विशेष ध्यान दिन सरकारलाई सचेत गराएका थिए ।  वन तथा वातावरण मन्त्रालयले गत वैशाख २३ गते विधेयक प्रतिनिधि सभामा दर्ता गराएको थियो ।