चीन एक्ल्याउने पश्चिमा डिजाइनमा प्रधानमन्त्री ओली (भिडियोसहित)
प्रधानमन्त्री केपी शर्मा ओलीको जेठ २५ गतेबाट हुन लागेको युरोप भ्रमणलाई शंकास्पद रुपमा हेरिएको छ । युरोप भ्रमणकाक्रममा फ्रान्स र स्विटजरल्याण्डसंगै बेलायतको भ्रमणलाई निकै रहस्यात्मक लिइएको छ ।
बाहिरबाट देखिदा केही अन्तर्राष्ट्रिय समारोहमा सहभागी हुने जस्तो देखिएपनि भित्री चीनविरोधी योजनाको विस्तार भएको राजनीतिक विश्लेषक भरत दाहालको बुझाइ छ । नेपाल विरोधी मिसनमा कांग्रेस र माओवादीपछि एमाले प्रयोग भैरहेको उनको दावी छ ।
दाहाल भन्छन्, ‘एमाले पश्चिमाहरुको तेस्रो प्रयोगशाला हो । अहिले नेकपा बनेपछि पश्चिमाहरुले यसका नेताहरुलाई झन् सहज प्रयोग गरिरहेका छन् । यो सरकार पश्चिमाहरुको ग्रीपमा छ । प्रधानमन्त्री ओलीका हरेक गतिविधिले त्यसलाई पुष्टि गरेका छन् । होली वाइन प्रकरण, अमेरिकी सैन्य गठबन्धन ‘इण्डो प्यासिफिक स्ट्राटिजी’ मा नेपालको संलग्नता, दक्षिण कोरियाली बदनाम एक युनिभर्सिटीबाट विद्यावारिधिको उपाधि जस्ता दर्जनौ उदाहरण छन् । अहिले प्रधानमन्त्री ओली युरोप जानुको प्रमुख कारण पनि चीन घेर्ने अभियानको हिस्सा बन्न नै हो । ’
भर्खर अमेरिकी राष्ट्रपति डोनाल्ड ट्रम्पले बेलायत भ्रमण पूरा गरेका छन् । अमेरिकाले चीनविरुद्ध नेपाललाई कसरी प्रयोग गरिरहेको छ भन्ने छर्लङ्ग भैसक्यो । परराष्ट्रमन्त्री प्रदीप ज्ञवालीको अमेरिका भ्रमण, अमेरिकाले उत्तर कोरिया र स्वतन्त्र तिब्बत पक्षधरका सम्बन्धमा चासो राखेर नेपाललाई लेखेको पत्र, सैन्य गठवन्धनमा सहभागिता यी सबै विषय चीन विरोधी नै हुन् ।
">
अमेरिकाले नेकपाका अर्का अध्यक्ष पुष्पकमल दाहाल प्रचण्डलाई आफैं कहाँ बोलाएर प्रशिक्षण दियो । अहिले बेलायतमार्फत प्रधानमन्त्री ओलीलाई प्रभावित गर्दैछ । ट्रम्पको बेलायत भ्रमणमा चीनको विषयमा गम्भीर कुरा भएको र त्यसमा नेपाललाई उपयोग गर्ने रणनीतिबारे समेत उच्चस्तरीय वार्ता भएको दाहालको दावी छ ।
ओलीले भ्रमण गर्न लागेका तीनवटै राष्ट्र बेलायत, फ्रान्स र स्वीटजरल्याण्ड चीन विरोधी कित्तामा छन् । यिनीहरु अमेरिकाका सहयोगी हुन् । यसमा प्रधानमन्त्री ओलीले नेपाललाई पनि मिसाएका छन् । चीन घेर्ने सवालमा अमेरिका र भारत पनि एक ठाउँमा उभिएको दाहालको तर्क छ ।
‘बिआरआई’ कार्यान्वयन
विश्लेषक दाहालका अनुसार चीनसंग भएको बिआरआई प्रोटोकल हस्ताक्षर कार्यान्वयनमा समस्या उत्पन्न हुनेछ । सरकार पश्चिमा रणनीतिमा फसेको र यो मामिलामा भारत पनि पश्चिमा शक्तिकै पक्षमा रहेकाले ‘बिआरआई’ कार्यान्वयन नहुन सक्छ ।
चीनका राष्ट्रपति सी जिनपिङ रुस भ्रमणमा जानु पनि महत्वपूर्ण छ । रुस जाँदै गर्दा सीले इरानको विषयलाई लिएर अमेरिकाको आलोचना गरेका छन् । अमेरिकाका कारण मध्यपूर्वी देशमा अस्थिरता बढेको उनले ठाडो रुपमा भनेका छन् । यस्तो बेला अमेरिकी गठबन्धनमा जाने र उसको योजना अनुसार काम गर्ने वर्तमान सरकारलाई चीनले राम्रो व्यवहार गर्छ भनेर मान्न सकिन्न ।
">
नेपाल हिन्दू राष्ट्र हुँदैन
अहिले धेरै नेपालीलाई भारतमा विजेपीको जित र प्रधानमन्त्री मोदी भएपछि नेपाल हिन्दू राष्ट्र हुन्छ कि भन्ने लागेको छ । यो सबै भ्रम हो । मोदी पहिलो पटक प्रधानमन्त्री हुँदा पनि नेपालमा हिन्दू राष्ट्र कायम गर्ने पक्षमा थिएनन् । उनको प्राथमिकता भनेको आफनो राष्ट्रलाई के गरेर हित हुन्छ भन्ने मात्र छ । सुरक्षा, जाली नोट, आतंकवाद, सीमा, जलश्रोत बाहेक नेपालसंग उनको अरु केही चासो छैन । बाहिर बाहिर जो धर्मका विषय लिएर आउँछन् त्यो त राजनीतिक खपत र प्रचारका लागि मात्र हो ।
‘यदि मोदी हिन्दू धर्मको अभियानमा छन् भने सबैभन्दा पहिले उनले आफनै देशमा राम मन्दिर बनाउँछन् । ख्वै त ?’ दाहालको प्रश्न छ ।
नेकपा सखाप हुन्छ
सत्तारुढ दल नेकपा सखाप हुन्छ । मैले पहिले देखि भन्दै आएको हुँ एमालेलाई सिध्याउनकै लागि माओवादी केन्द्रसंग एकता भएर नेकपा बनेको हो । कांग्रेस र माओवादीलाई प्रयोग गरेर सिध्याएपछि अब पालो एमालेको हो ।
जुन दिनसम्म ओली प्रचण्डहरुले विदेशी स्वार्थ अनुसार काम गर्छन, यो चलिरहन्छ, जुन दिन काम पूरा हुन्छ वा यिनीहरुको सामथ्र्य सकिन्छ, त्यही दिनबाट टुक्राटुक्रा पार्छन्, यो निश्चित हो ।
राजासमेत समेटिने संयन्त्र
मुलुकलाई निकास दिन तत्काल यी राजनीतिक दलहरुको विकल्पतर्फ लाग्न जरुरी छ । दीर्घकालिनरुपमा सैद्धान्तिक सुधारसहित अघि बढ्नुपर्ने भएपनि तत्कालै १२ बुँदे सहमति विरुद्धका सबै शक्तिहरु एकजुट हुनुपर्छ ।
१२ बुँदे सहमतियताका जति पनि परिवर्तन भएका छन्, सबै उल्ट्याउनुपर्छ । नयाँ राजनीतिक संयन्त्र बनाउनुपर्छ । त्यसमा पूर्वराजादेखि विप्लवसम्म अटाउन सक्छन् । यो क्रममा शक्तिको दुरुपयोग गरी अकुत सम्पत्ति कमाउनेलाई जेल हाल्नुपर्छ । अनि मात्र देश बन्छ ।
