विनोद–शरदको बिस्फोटक ब्याटिङको मद्दतले मलेसियाविरुद्धको सिरिज नेपालले जित्यो
काठमाडौं : टि–२० सिरिजको दोस्रो खेलमा नेपालले मलेसियालाई १६७ रनमा प्याक गरेको छ। नेपालले दिएको १७४ रनको लक्ष्य पछ्याउने क्रममा मलेसियाले २० ओभरमा ७ विकेट गुमाएर १६७ रन जोड्यो।
मलेसियाले छैठौं विकेटका रुपमा अमिनुद्दिन रमिलाई २४ रनमा गुमाएको हो । उनलाई कप्तान पारस खड्काले आउट गरे । यसअघि मलेसियाले कप्तान अहमद फैजलाई १७, अनवार अरुदिनलाई ७, शाकिफ सरिफलाई १०, सायद ऐजालाई ५० र विरन्दीप सिंहलाई २३ रनमा गुमायो ।
टस जितेर ब्याटिङ रोजेको नेपालले निर्धारित २० ओभरमा ६ विकेट गुमाएर १७४ रन बनायो । नेपालका लागि विनोद भण्डारीले बिस्फोटक ब्याटिङ गरे । उनले ५ छक्का र ३ चौकाको मद्दतमा २५ बलमा नट आउट ५१ रनको योगदान दिए ।
टि–२० मा नेपालले बनाएको यो अहिले सम्मकै ठूलो लक्ष्य हो । यस अघि नेपालले सन् २०१४ को टि–२० विश्वकप क्रिकेटमा हङकङविरुद्ध बनाएको १४९ रननै उच्च स्कोर रहँदै आएको थियो । यस्तै, शरद भेषवाकरले २८ बलमा ४०, कप्तान पारस खड्काले १९ बलमा २३, रोहित कुमार पौडेलले २३ बलमा १९, करण केसीले १० बलमा १६, ज्ञानेन्द्र मल्लले ३ बलमा ७, पवन सराफले ११ बलमा १० र सोमपाल कामीले नट आउट १ बलमा १ रन बनाए ।
बलिङमा मलेसियाका फित्री शामले ३, सैद अजिज र सर्विन मुनियनले एक–एक विकेट लिए । पहिलो खेलमा नेपालले मलेसियालाई ७ विकेटले हराएको थियो ।
क्रिकेट
