स्नोइ होराइजन ट्रेक्सका सञ्चालक बोधराज भण्डारी नेपालको पर्यटन क्षेत्रका अन्तरकुन्तर सबै थाहा पाउँछन् । नेपालमा पर्यटनको प्रचुर सम्भावना भएर पनि मुलुक किन पछि परेको भन्ने विषयमा उनलाई राम्रो जानकारी छ । उनी सबै कुरामा सरकारमात्रै दोषी ठान्दैनन् । पर्यटकलाई जानाजान बिरामी बनाएर बीमा असूल्ने व्यवसायी पनि खराब हुन् भन्न उनी हिच्किचाउँदैनन् । उनले ट्रेकिङ एजेन्सिज एसोसिएसन अफ नेपाल (टान)को निर्वाचनमा दलीय प्रभाव परेको पनि रुचाएका छैनन् ।  उनी भन्छन्, ‘देशमा भएको राजनीतिक परिवर्तनसँगै टानमा पनि प्रभाव परेको छ । टानमा पनि दलका आधारमा व्यवसायीहरु विभक्त भएका छन् । व्यवसायीहरुले व्यवसाय मात्रे गरे पनि हुन्छ । दलीय आधारमा विभक्त हुन आवश्यक छैन भन्ने आवाज बलियो भएर आएको छ । हरेक व्यक्तिमा राजनीतिक प्रभाव रहन्छ । हिजोका दिनमा सिमित मानिसहरुले मात्रै पर्यटन व्यवसायमा पहुँच राख्न सक्थे । अहिले भने परिवर्तन भएको छ अवस्था ।’ 

नेपालमा पर्यटनको विकास र विस्तार कसरी सम्भव छ? भन्ने प्रश्नमा उनी केही राष्ट्रिय विषयमा ध्यान तान्छन् । उनी भन्छन्, ‘पहिलो कुरा त पर्यटकहरुले सोझै, सुलभ मूल्यमा नेपाल आउन पाउनु पर्छ । उनीहरुले सजिलै जाजको टिकट किन्न पाउनु पर्छ । अरु गन्तव्यभन्दा नेपालमा हवाई भाडा चर्को छ, त्यो अन्त्य हुनुपर्छ  । नेपाल एअरलाईन्सको स्तरोन्नति गर्नुपर्छ । ठाउँ ठाउँमा उडान भर्ने काम गर्नुपर्छ । अन्तर्राष्ट्रिय विमानस्थलको सुविधा बढाउनु पर्छ । पर्यटकको पहिलो इम्प्रेसन काठमाडौंबाट हुन्छ । काठमाडौंलाई धुवा, धुलो र फोहोरमुक्त सफा हराभरा बनाउनु पर्छ । यहाँका बाटाघाटा राम्रा हुनुपर्छ । भूकम्प गएको ७२ सालमा भूकम्प गयो, अहिलेसम्म पुराना सम्पदा बनेका छैनन् । काठमाडौंमा पर्यटकले यहाँको घर हेर्न आउने होइनन् । सम्पदा हेर्न आउने हुन् । ती सम्पदाको पुनर्निर्माण चाँडो हुनुपर्छ । यी हाम्रा पहिलो चरणका माग हुन् । यी मागमा हाम्रो निहित स्वार्थ छैन । समग्रमा देशलाई फाइदा हुँदा हामीलाई पनि होला भन्ने हो ।’ 

भारतबाट बस चढेर आएकालाई समेत गणना गर्दा, एनआरएन, आइएनजिओका कर्मचारीसमेतलाई गणना गरेर १२ लाख पर्यटक पुगेको उनी बताउँछन् । भन्छन्,‘ भारतबाट बस चढेर आउने पर्यटकहरु घरबाटै दालचामल, सिरक डस्ना मात्रै होइन पानसमेत बोकेर आउँछन् । उहाँ त उनीहरुले थुक्ने मात्रै हो । त्यस्ता पर्यटकहरु पनि छन् । त्यस्तैलाई गनेर १२ लाख पुर्याएको हो ।’

भ्रमण वर्ष घोषणा मात्रैले केही नहुने भण्डारी बताउँछन् । उनले भने, ‘ मैले घोषणा गर्नुलाई विरोध गरेको छैन । तर भ्रमण वर्ष पूर्वका तयारीलाई मैले मानेको छैन । भ्रमण वर्षको संयोजक सुरज बैद्य नै ठीक भएन । किनभने उहाँ पर्यटन क्षेत्रको होइन । उहाँ अरु नै उद्योग गर्ने मान्छे हो । उहाँसँग कुनै भिजन छैन । जसका कारण उहाँले यो भ्रमण वर्षलाई चलायमान बनाउन सक्नु भएको छैन । उहाँ हामीसँगसमेत छलफल गर्नु भएको छैन । एकाध व्यक्तिहरुसँग उहाँले कुरा गरेको भन्ने सुनिएको छ ।’